കൊച്ചി:പെട്രോ കെമിക്കല്‍ വ്യവസായങ്ങള്‍ കൂടുതലായി കൊച്ചിയിലേക്കെത്തുമെന്നും,ബിപിസിഎല്ലിലെ ഐആര്‍ഇപി പദ്ധതി കൊച്ചിയുടെ വ്യവസായ സാദ്ധ്യതകള്‍ വര്‍ദ്ധിപ്പിക്കുന്നതാണെന്നും പ്രധാനമന്ത്രി നരേന്ദ്രമോദി.കൊച്ചി റിഫൈനറിയില്‍ ബിപിസിഎല്ലിന്റെ ഐ.ആര്‍.ഇ.പി.പദ്ധതികളുടെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം.രണ്ട് വര്‍ഷത്തിനിടെ രാജ്യത്തെ ആറു കോടിയോളം വരുന്ന പാവപ്പെട്ട ജനങ്ങള്‍ക്ക് പാചകവാതക കണക്ഷന്‍ നല്‍കാനായതായി മോദി പറഞ്ഞു.
മുഖ്യമന്ത്രി പിണറായി വിജയന്‍, കേന്ദ്രമന്ത്രിമാരായ ധര്‍മേന്ദ്ര പ്രധാന്‍, അല്‍ഫോണ്‍സ് കണ്ണന്താനം, ഗവര്‍ണര്‍ പി.സദാശിവം തുടങ്ങിയവര്‍ ചടങ്ങില്‍ പങ്കെടുത്തു. അതേസമയം, പൊതുമേഖലയെ ശക്തിപ്പെടുത്താന്‍ സംസ്ഥാനം മുന്‍കയ്യെടുത്തെന്നും പദ്ധതികള്‍ക്ക് സംസ്ഥാനസര്‍ക്കാര്‍ നികുതി ഇളവടക്കം നല്‍കിയിട്ടുണ്ടെന്നും മുഖ്യമന്ത്രി പിണറായി വിജയന്‍ പറഞ്ഞു. ഉച്ചയ്ക്ക് 2 മണിയോടെ കൊച്ചി നാവികസേനാ വിമാനത്താവളത്തില്‍ എത്തിയ മോദി തുടര്‍ന്ന് ഹെലിക്കോപ്റ്റര്‍ മാര്‍ഗ്ഗമാണ് കൊച്ചി റിഫൈനറിയിലെത്തിയത്.
