ടിക്ടോക്കിന് ഇന്ത്യന്‍ ബദല്‍ എന്ന് വിളിക്കപ്പെട്ട മിത്രോണ്‍ ആപ്പ് പ്ലേ സ്റ്റോറില്‍ തിരിച്ചെത്തി. ചൈനീസ് വീഡിയോ നിര്‍മ്മാണ ആപ്ലിക്കേഷനായ ജൂണ്‍ 2നാണ് ഗൂഗിള്‍ നീക്കംചെയ്തത്. ഗൂഗിളിന്റെ ചില മാര്‍ഗ്ഗനിര്‍ദ്ദേശങ്ങള്‍ ലംഘിച്ചതിനാല്‍ അപ്ലിക്കേഷന്‍ നീക്കംചെയ്തുവെന്നായിരുന്നു വിവരം. പ്ലേസ്റ്റോറിന്റെ നിയമാവലി പ്രകാരം, മറ്റ് അപ്ലിക്കേഷനുകള്‍ക്ക് സമാനമായ അനുഭവം നല്‍കുന്ന അപ്ലിക്കേഷനുകള്‍ പ്ലേ സ്റ്റോറില്‍ അനുവദനീയമായിരുന്നില്ല.
ടിക് ടോക്കിന്റെ നഗ്നമായ പകര്‍പ്പായിരുന്നു മിത്രോണ്‍ അപ്ലിക്കേഷന്‍ എന്നാണ് ഗൂഗിള്‍ കണ്ടെത്തിയത്. തുടര്‍ന്നാണ്, ഇത് പ്ലേ സ്റ്റോറില്‍ നിന്ന് നീക്കംചെയ്തത്. എന്നാല്‍ ചൈനീസ് ആപ്പായ ടിക് ടോക്കിന്റെ ബദല്‍ എന്ന നിലയില്‍ കുറഞ്ഞ ദിവസം കൊണ്ട് ഇത് വന്‍ഹിറ്റായി മാറിയിരുന്നു.പ്ലേ സ്റ്റോറില്‍ ആപ്ലിക്കേഷന്‍ തിരികെ കൊണ്ടുവരുന്നതിനെക്കുറിച്ച് സംസാരിച്ച ഗൂഗിള്‍ ഒരു പ്രസ്താവനയില്‍ പറഞ്ഞു, ‘സമീപകാലത്ത് നിരവധി ആപ്ലിക്കേഷന്‍ നീക്കംചെയ്യലുകള്‍ക്ക് ഇന്ത്യയില്‍ വിധേയമായിട്ടുണ്ട്. ഈ ആഴ്ച ആദ്യം, നിരവധി സാങ്കേതിക നയ ലംഘനങ്ങള്‍ കണ്ടെത്തിയതിനെ തുടര്‍ന്ന് ഈ വീഡിയോ അപ്ലിക്കേഷനും നീക്കം ചെയ്തു.
അപ്ലിക്കേഷന്‍ രൂപകല്‍പ്പനയില്‍ മാറ്റങ്ങള്‍ വരുത്തി ഒപ്പം സ്വകാര്യതാ നയപേജും അപ്ഡേറ്റുചെയ്തു. പ്രൊമോട്ടര്‍ വെബ്സൈറ്റും നിര്‍മ്മിക്കുകയും ഇപ്പോള്‍ അപ്ഡേറ്റ് ചെയ്യുകയും ചെയ്തിട്ടുണ്ട്. ബെംഗളൂരുവില്‍ നിന്നുള്ള ഒരു സൗജന്യ ഹ്രസ്വ വീഡിയോ സോഷ്യല്‍ പ്ലാറ്റ്ഫോമാണ് മിത്രോണ്‍. ആളുകള്‍ക്ക് അവരുടെ നൂതന വീഡിയോകള്‍ പ്രദര്‍ശിപ്പിക്കുന്നതിനായി ഇത് രൂപകല്‍പ്പന ചെയ്തിരിക്കുന്നു. ഉപയോക്താക്കള്‍ക്ക് അവരുടെ വീഡിയോകള്‍ സൃഷ്ടിക്കാനും എഡിറ്റുചെയ്യാനും ഷെയര്‍ ചെയ്യാനും മിത്രോണ്‍ വേഗവും തടസ്സമില്ലാത്തതുമായ ഇന്റര്‍ഫേസ് നല്‍കുന്നുണ്ട്.
