ഹ്യൂസ്റ്റണ്‍: യു.എസിലെ കാന്‍സസില്‍ നടന്ന വെടിവെപ്പില്‍ ഇന്ത്യക്കാരെ രക്ഷിക്കാന്‍ ശ്രമിച്ച ഇയാന്‍ ഗ്രില്‌ളോട്ടിനെ പ്രശംസിച്ച് വിദേശകാര്യമന്ത്രി സുഷമാ സ്വരാജിന്റെ സന്ദേശം.
ഇന്ത്യക്കാരന്റെ കൊലക്കിടയാക്കിയ വെടിവെപ്പ് തടയാനുള്ള ശ്രമത്തിനിടെ 24കാരനായ ഗ്രില്‌ളോട്ടിന് പരിക്കേറ്റിരുന്നു.
താങ്കളുടെ ധീരതയെ ഇന്ത്യ അഭിവാദ്യം ചെയ്യുന്നുവെന്നും ഏറ്റവും വേഗത്തില്‍ പഴയ ആരോഗ്യാവസ്ഥയിലേക്ക് തിരിച്ചുവരാനാവട്ടെയെന്നും ഹ്യൂസ്റ്റണിലെ ഇന്ത്യന്‍ കോണ്‍സല്‍ ജനറല്‍ അനുപം റായ് വശം കൊടുത്തയച്ച സന്ദേശത്തില്‍ സുഷ്മ സ്വരാജ് പറഞ്ഞു.
യുണിവേഴ്‌സിറ്റി ഓഫ് കാന്‍സസ് ആശുപത്രിയില്‍ കഴിയുന്ന ഗ്രില്‌ളോട്ടിനെയും കുടുംബത്തെയും നേരിട്ട് സന്ദര്‍ശിച്ചാണ് അനുപം റായ് സന്ദേശം കൈമാറിയത്.
സുഷമക്ക് 73 ലക്ഷം ഫോളോവേഴ്‌സുണ്ടെന്നും അവരുടെയെല്ലാം ക്ഷേമാശംസ അറിയിക്കുന്നുവെന്നും അദ്ദേഹം പറഞ്ഞു.
