കോഴിക്കോട്: മലബാര് മേഖലയിലെ കര്ഷകരില് നിന്ന് മില്മ നാളെ മുതല് പാല് സംഭരിക്കും. ലോക്ഡൗണില് പാല് ഉത്പാദനം വന്തോതില് കൂടുകയും എന്നാല് പാല് വില്പന ഗണ്യമായി കുറയുകയും ചെയ്ത സാഹചര്യത്തിലാണ് പ്രതിസന്ധി ഉടലെടുത്തത്. മൂന്നുലക്ഷം ലിറ്റര് പാലാണ് പ്രതിദിനം മലബാര് യൂണിയനില് മിച്ചം വന്നിരുന്നത്. അതിനാല് ലോക്ഡൗണ് സൃഷ്ടിച്ച ഈ പ്രതിസന്ധി തരണം ചെയ്യാന് തീവ്ര ശ്രമങ്ങള് ആരംഭിച്ചിട്ടുണ്ടെന്നും നാളെ മുതല് സംഘങ്ങളില് നിന്ന് 80 ശതമാനം പാല് സംഭരിക്കുമെന്നും മില്മ മലബാര് മേഖലാ യൂണിയന് ചെയര്മാന് കെ എസ് മണി, മാനേജിങ് ഡയറക്ടര് ഡോ. പി മുരളി എന്നിവര് അറിയിച്ചു.
അയല് സംസ്ഥാനങ്ങളിലും ലോക്ഡൗണായതിനാല് മിച്ചം വരുന്ന പാല് ഇവിടങ്ങളിലയച്ച് പൊടിയാക്കുന്നതിലും തടസങ്ങള് നേരിട്ടു. ഇതേത്തുടര്ന്ന് ചൊവ്വാഴ്ച മുതല് കര്ഷകരില് നിന്ന് സംഭരിക്കുന്ന പാലിന്റെ അളവ് മില്മ 60 ശതമാനമാക്കി കുറച്ചിരുന്നു. തുടര്ന്നുള്ള ദിവസങ്ങളില് ഉത്പാദിപ്പിക്കുന്ന നൂറു ശതമാനം പാലും കര്ഷകരില് നിന്ന് വാങ്ങാനാകുമെന്നാണ് കരുതുന്നതെന്നും മില്മ എംഡി പറഞ്ഞു.