5ജി സ്മാർട്ട്ഫോണുമായി വിപണിയിൽ കൂടുതൽ സജീവമാവാൻ ഒരുങ്ങി മൈക്രോമാക്സ്. കമ്പനിയുടെ ബെംഗളൂരുവിലെ റിസർച്ച് ആൻഡ് ഡെവലപ്മെന്റ് സെന്ററിൽ 5ജി സ്മാർട്ട്ഫോണുമായി ബന്ധപെട്ട പ്രവർത്തനങ്ങൾ അന്തിമഘട്ടത്തിലാണ്. കമ്പനിയുടെ സഹസ്ഥാപനായ രാഹുൽ ശർമ്മയാണ് ഇക്കാര്യം വെളിപ്പെടുത്തിയത്. എന്നാൽ എപ്പോൾ മൈക്രോമാക്സ് 5ജി സ്മാർട്ട്ഫോൺ വിപണിയിലെത്തുമെന്ന കാര്യം വ്യക്തമാക്കിയിട്ടില്ല.
6 ജിബി റാമും, മികച്ച ഡിസ്പ്ലേ റിഫ്രഷ് റേറ്റും, ലിക്വിഡ് കൂളിങുമുള്ള ഒരു പുത്തൻ സ്മാർട്ട്ഫോണും മൈക്രോമാക്സ് തയ്യാറാക്കുന്നുണ്ട്. ഇത് ഇൻ നോട്ട് 1 ഫോണിന്റെ പരിഷ്ക്കരിച്ച പതിപ്പാവില്ല എന്നും പുത്തൻ ഫോൺ ആയിക്കും എന്നും രാഹുൽ കൂട്ടിച്ചേർത്തു.
5ജി സ്മാർട്ട്ഫോൺ നിർമ്മിക്കുന്നതോടൊപ്പം വിവിധ മൊബൈൽ അക്‌സെസ്സറികളും മൈക്രോമാക്സ് ബ്രാൻഡിങ്ങിൽ ഉടൻ വിപണിയിലെത്തും. ട്രൂ വയർലെസ്സ് സ്റ്റീരിയോ (TWS) ഇയർബഡ്ഡുകളാണ് ഈ ശ്രേണിയിൽ ആദ്യം വില്പനക്കെത്തുക. “പുതിയ സാങ്കേതികവിദ്യയും വ്യത്യസ്തമായ രൂപകൽപ്പനയും മൈക്രോമാക്സ് ഇയർ ബെഡിനുണ്ടാവും,” ശർമ്മ പറഞ്ഞു.
രണ്ട് വർഷത്തെ സോഫ്റ്റ്വെയർ അപ്‌ഡേറ്റ് ഉറപ്പുമായി വന്ന മൈക്രോമാക്സ് ഇൻ നോട്ട് 1 ഏപ്രിലിൽ ആൻഡ്രോയിഡ് 11 ലേക്ക് അപ്‌ഡേറ്റ് ചെയ്യുമെന്ന് ശർമ്മ വ്യക്തമാക്കി. നവംബറിൽ ആൻഡ്രോയിഡ് 10 ഓഎസ്സുമായാണ് മൈക്രോമാക്സ് ഇൻ നോട്ട് 1 വിപണിയിലെത്തിയത്. മൈക്രോമാക്സ് ഫോണുകൾക്കുള്ള പുതിയ സോഫ്റ്റ് വെയർ അപ്‍ഡേയ്റ്റും ഈ മാസം തന്നെ പുറത്ത് വിടും.
