സ്വിഫ്റ്റിന് പുതിയ ലിമിറ്റഡ് എഡിഷനുമായി മാരുതി എത്തുന്നു.
ഔദ്യോഗിക അറിയിപ്പുകള്‍ ലഭിച്ചിട്ടില്ലെങ്കിലും പുത്തന്‍ സ്വിഫ്റ്റ് ലിമിറ്റഡ് എഡിഷന്റെ പരസ്യം മാരുതി പുറത്ത് വിട്ടു.
പെട്രോള്‍, ഡീസല്‍ വേരിയന്റുകളില്‍ മാരുതി സ്വിഫ്റ്റ് ലിമിറ്റഡ് എഡിഷന്‍ ലഭിക്കും.
5.44 ലക്ഷം രൂപ എക്‌സ്‌ഷോറൂം വിലയിലാണ് സ്വിഫ്റ്റ് ലിമിറ്റഡ് എഡിഷന്‍ പെട്രോള്‍ പതിപ്പ് ലഭിക്കുക എന്നാണ് ഔദ്യോഗിക വെബ്‌സൈറ്റില്‍ പറയുന്നത്.
അതേസമയം 6.39 ലക്ഷം രൂപ വിലയിലാണ് സ്വിഫ്റ്റ് ലിമിറ്റഡ് എഡിഷന്‍ ഡീസല്‍ പതിപ്പ് ഒരുങ്ങുന്നത്.
പുതുതലമുറ സ്വിഫ്റ്റിനെ ഇന്ത്യന്‍ വിപണിയില്‍ അവതരിപ്പിക്കാനുള്ള അവസാനവട്ട ഒരുക്കത്തിലാണ് മാരുതി.
പുതിയ പതിപ്പിന്റെ വരവിന് മുമ്പെ നിലവിലുള്ള സ്റ്റോക്ക് വിറ്റഴിക്കുകയാണ് പുതിയ ലിമിറ്റഡ് എഡിഷന്‍ സ്വിഫ്റ്റുകളിലൂടെ മാരുതി ലക്ഷ്യം വെയ്ക്കുന്നത്.
ഫെബ്രുവരിയില്‍ നടക്കുന്ന ഓട്ടോ എക്‌സ്‌പോയില്‍ വെച്ച് പുതുതലമുറ മാരുതി സ്വിഫ്റ്റ് ഇന്ത്യയില്‍ അവതരിപ്പിക്കും.
ബോണറ്റിനും, വശങ്ങള്‍ക്കും, റൂഫിനും കുറുകെ ഒരുങ്ങിയിട്ടുള്ള ഡീക്കലുകളാണ് ലിമിറ്റഡ് എഡിഷന്റെ പ്രത്യേകത.
ആന്‍ഡ്രോയ്ഡ് ഓട്ടോ, ആപ്പിള്‍ കാര്‍പ്ലേ കണക്ടിവിറ്റിയോടെയുള്ള ടച്ച്‌സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റവും മാരുതി സ്വിഫ്റ്റ് ലിമിറ്റഡ് എഡിഷനില്‍ ഉപഭോക്താക്കള്‍ക്ക് ലഭിക്കും.
