മാരുതി എസ്‍യുവികള്‍ വാങ്ങാൻ ജനം തള്ളിക്കയറുന്നു, കണ്ണുനിറഞ്ഞ് കമ്പനി!

ഇന്ത്യയിലെ ഏറ്റവും വലിയ പാസഞ്ചർ വാഹന നിർമ്മാതാക്കളായ മാരുതി സുസുക്കി, 2022 അവസാന പാദത്തിൽ ശക്തമായ വളർച്ച രേഖപ്പെടുത്തി. കഴിഞ്ഞ വർഷം ഇതേ കാലയളവിൽ 10.11 ബില്യൺ രൂപയായിരുന്നതിൽ നിന്ന് 23.52 ബില്യൺ രൂപ (288.5 മില്യൺ ഡോളർ) ലാഭം കമ്പനി രേഖപ്പെടുത്തി. ഉത്സവ സീസണിലെ ഉയർന്ന ഡിമാൻഡും അർദ്ധചാലകങ്ങളുടെ മെച്ചപ്പെട്ട ലഭ്യതയും കഴിഞ്ഞ പാദത്തിൽ കമ്പനികളില്‍ ഉടനീളം കാർ വിൽപ്പന 23 ശതമാനം വരെ ഉയർത്തി എന്നാണ് സൊസൈറ്റി ഓഫ് ഇന്ത്യൻ ഓട്ടോമൊബൈൽ മാനുഫാക്‌ചറേഴ്‌സ് (സിയാം)ന്‍റെ കണക്കുകള്‍ പറയുന്നത്.

ഇൻഡോ-ജാപ്പനീസ് വാഹന നിർമ്മാതാക്കൾക്ക് ഈ പാദത്തിൽ 465,911 യൂണിറ്റുകൾ റീട്ടെയിൽ ചെയ്യാൻ കഴിഞ്ഞു. ഒരു വർഷം മുമ്പ് ഇത് 430,668 യൂണിറ്റായിരുന്നു. കോം‌പാക്റ്റ് കാർ സെഗ്‌മെന്റ് അതായത് ബലെനോ ഹാച്ച് ഉൾപ്പെടെ ഏകദേശം 17 ശതമാനം വളർച്ച കൈവരിച്ചപ്പോൾ, എസ്‌യുവികളുടെ (ഗ്രാൻഡ് വിറ്റാര, ബ്രെസ്സ) വിൽപ്പന 23 ശതമാനം വർദ്ധിച്ചു. അർദ്ധചാലകങ്ങളുടെ മികച്ച വിതരണത്തോടെ, പുതുതായി പുറത്തിറക്കിയ മോഡലുകൾക്കായുള്ള 119,000 ബുക്കിംഗുകൾ ഉൾപ്പെടെ, തീർപ്പാക്കാത്ത ഓർഡറുകൾ ഏകദേശം 363,000 ആയി കുറയ്ക്കാൻ മാരുതി സുസുക്കിക്ക് കഴിഞ്ഞു.

മാരുതി ഗ്രാൻഡ് വിറ്റാര എസ്‌യുവി മോഡൽ ലൈനപ്പ് നിലവിൽ 10.45 ലക്ഷം മുതൽ 19.65 ലക്ഷം രൂപ വരെ (എല്ലാം എക്‌സ്‌ഷോറൂം) വില പരിധിയിൽ ലഭ്യമാണ്. ഇത് സിഗ്മ, ഡെൽറ്റ, സീറ്റ, ആൽഫ, സീറ്റ+, ആൽഫ+ എന്നീ ട്രിമ്മുകളിലും ആകെ 11 വേരിയന്റുകളിലും വരുന്നു. പുതിയ മാരുതി എസ്‌യുവിയുടെ പവർട്രെയിൻ സജ്ജീകരണത്തിൽ 103 ബിഎച്ച്പി, 1.5 എൽ കെ15 സി പെട്രോൾ മൈൽഡ് ഹൈബ്രിഡ്, 92 ബിഎച്ച്പി, 1.5 എൽ അറ്റ്കിൻസൻ സൈക്കിൾ പെട്രോൾ യൂണിറ്റ് എന്നിവ ഉൾപ്പെടുന്നു. ആദ്യത്തേത് 5-സ്പീഡ് മാനുവൽ അല്ലെങ്കിൽ 6-സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്‌സ് ഉപയോഗിച്ച് ലഭിക്കുമെങ്കിലും, രണ്ടാമത്തേതിന് ഒരു e-CVT യൂണിറ്റ് ലഭിക്കുന്നു. സിഎൻജി ഇന്ധന ഓപ്ഷനുമായി വരുന്ന ഇന്ത്യയിലെ ആദ്യത്തെ എസ്‌യുവിയാണ് ഗ്രാൻഡ് വിറ്റാര.

മാരുതി സുസുക്കി ബ്രെസ്സയുടെ വില 7.99 ലക്ഷം രൂപയിൽ തുടങ്ങി 13.96 ലക്ഷം രൂപ വരെയാണ്. 1.5L K15C പെട്രോൾ എഞ്ചിൻ നൽകുന്ന Lxi, VXi, ZXi, ZXi+ എന്നീ നാല് വകഭേദങ്ങളിലാണ് ഇത് വാഗ്ദാനം ചെയ്യുന്നത്. ഈ എഞ്ചിൻ 103 bhp കരുത്തും 137 Nm ടോര്‍ക്കും നൽകുന്നു. ഓഫറിൽ അഞ്ച് -സ്പീഡ് മാനുവൽ, ആറ് സ്പീഡ് ടോർക്ക് കൺവെർട്ടർ എന്നിങ്ങനെ രണ്ട് ഗിയർബോക്സുകൾ ഉണ്ട് 20.15kmpl (MT), 19.80kmpl (AT) ഇന്ധനക്ഷമതയാണ് പുതിയ ബ്രെസ്സ വാഗ്ദാനം ചെയ്യുന്നതെതെന്നാണ് മാരുതി സുസുക്കി പറയുന്നത്.