ഫിന്‍ടെക് മേഖലയിലെ മുന്‍നിര കമ്പനിയായ ഏസ്മണി ഇന്റർനെറ്റിന്റെ സഹായമില്ലാതെ ഓഫ്‌ലൈന്‍ യുപിഐ പേയ്‍മെന്‍റ്, വെയറബിൾ എടിഎം കാർഡ് എന്നീ സേവനങ്ങള്‍ ആരംഭിച്ചു. നാഷണൽ പേയ്‍മെന്‍റ് കോർപറേഷൻ ഓഫ് ഇന്ത്യയുടെ യുപിഐ മേധാവി സൗരഭ് തോമർ, ഫിനാൻസ് വകുപ്പ് സ്‌പെഷ്യൽ ഡ്യൂട്ടി ഓഫീസർ മുഹമ്മദ് വൈ സഫീറുള്ള ഐഎഎസ് എന്നിവർ ചേർന്നാണ് സേവനങ്ങള്‍ ഉദ്ഘാടനം ചെയ്തത്. സ്മാർട്ട് ഫോണും ഇന്‍റർനെറ്റും ഇല്ലാതെ സാധാരണ കീപാഡ് ഫോൺ ഉപയോഗിച്ചും പണമിടപാട് നടത്താൻ സാധിക്കുന്ന സംവിധാനമാണ് ഓഫ്‌ലൈൻ യുപിഐ. എടിഎം കാർഡും മൊബൈൽ ഫോണുമില്ലാതെ മോതിരമായും കീചെയിനായും ഉപയോഗിക്കാനാവുന്ന തരത്തിൽ പണമിടപാടുകൾക്കായി രൂപപ്പെടുത്തിയിരിക്കുന്നവയാണ് വെയറബിൾ എടിഎം കാർഡുകള്‍.
ഇന്ത്യയിൽ ആദ്യമായി സാധാരണ ജനങ്ങൾക്കായി മലയാളം, തമിഴ് എന്നീ പ്രാദേശിക ഭാഷകളിൽ ഓഫ്‌ലൈൻ യുപിഐ സേവനങ്ങൾ അവതരിപ്പിക്കുന്നത് ഏസ്‍മണിയാണ്. ജനസംഖ്യയുടെ പകുതിയിലധികം ജനങ്ങളും ഡിജിറ്റൽ സാക്ഷരത നേടാത്ത ഇന്ത്യയിൽ ഓഫ്‌ലൈൻ യുപിഐ സംവിധാനത്തിന്റെ സാധ്യത വലുതാണ്. സാധാരണക്കാരെയും ഡിജിറ്റൽ പണമിടപാട് സേവനങ്ങള്‍ക്ക് പ്രാപ്തരാക്കാൻ ഈ സംവിധാനം വഴി സാധിക്കുമെന്ന പ്രതീക്ഷയിലാണ് ഏസ്മണി സിഇഒ ജിമ്മിൻ ജെ.. ഗ്രാമീണ മേഖലകളില്‍ പലപ്പോഴും ഇന്‍റര്‍നെറ്റ് സേവനത്തില്‍ തടസമുണ്ടാകുന്ന സാഹചര്യത്തിലും ഓഫ്‌ലൈന്‍ യുപിഐ വഴി ഉപഭോക്താവിന് പണമിടപാടുകൾ അനായാസമാകും എന്നാണ് കമ്പനി പറയുന്നത്.
