കുതിച്ചുയര്‍ന്ന് ചിദംബരത്തിന്റെ മഞ്ഞുമ്മല്‍ ബോയ്സ്. മലയാളത്തില്‍ നിന്ന് ഒരു സിനിമ ആദ്യമായി ആഗോളതലത്തില്‍ 200 കോടി ക്ലബില്‍ ഇടംനേടി ചരിത്രം സൃഷ്ടിച്ചിരിക്കുന്നു. മലയാളത്തിന്റെ ഇന്‍ഡസ്ട്രി ഹിറ്റായി മാറിയ ചിത്രം ഇനിയും ബോക്‌സ് ഓഫീസില്‍ വന്‍ കുതിപ്പ് തുടരുമെന്നാണ് കരുതുന്നതും.യഥാര്‍ഥ സംഭവത്തെ ആസ്പദമാക്കി ചിത്രം അവതരിപ്പിച്ചിരിക്കുന്നു എന്നതാണ് മഞ്ഞുമ്മല്‍ ബോയ്‌സിന്റെ ഒരു പ്രത്യേകത. ചിത്രത്തിന് പ്രേക്ഷകര്‍ നല്‍കിയ പിന്തുണയ്ക്ക് നന്ദി അറിയിച്ച് രംഗത്തെത്തിയിരിക്കുകയാണ് നടന്‍ സൗബിന്‍. ‘ആഗോളതലത്തില്‍ 200 കോടി നേടിയ ചിത്രം. ചരിത്രം നേട്ടവുമായി മഞ്ഞുമ്മല്‍ ബോയ്സ്. എല്ലാവര്‍ക്കും നന്ദി’- സൗബിന്‍ ഷാഹിര്‍ ഫേസ്ബുക്കില്‍ കുറിച്ചു.
തമിഴ് നാട്ടില്‍ മഞ്ഞുമ്മല്‍ ബോയ്സ് 50 കോടിയില്‍ അധികം നേടിയിരുന്നു. ഇതാദ്യമായിട്ടാണ് മലയാളത്തില്‍ നിന്നുള്ള ഒരു ചിത്രം ഇത്തരം നേട്ടത്തിലെത്തുന്നത്. വലിയ സ്വീകാര്യതയാണ് കേരളത്തിന് പുറത്ത് ചിത്രം നേടുന്നത്. കര്‍ണാടകത്തില്‍ നിന്ന് ഏകദേശം 11 കോടിയോളം മഞ്ഞുമ്മല്‍ ബോയ്സ് നേടിയിരിക്കുന്നു എന്നതാണ് പുതിയ റിപ്പോര്‍ട്ട്. സൗബിന്‍ ഷാഹിര്‍, ശ്രീനാഥ് ഭാസി, ബാലു വര്‍ഗീസ്, ഗണപതി, ഖാലിദ് റഹ്‌മാന്‍, ലാല്‍ ജൂനിയര്‍, ചന്തു സലീംകുമാര്‍, അഭിറാം രാധാകൃഷ്ണന്‍, ദീപക് പറമ്പോല്‍, വിഷ്ണു രഘു, അരുണ്‍ കുര്യന്‍ തുടങ്ങിയവരാണ് മഞ്ഞുമ്മല്‍ ബോയ്‌സില്‍ കേന്ദ്ര കഥാപാത്രങ്ങളെ അവതരിപ്പിക്കുന്നത്.
