തായ്പെ: എട്ട് സെക്കന്റ് നേരത്തേക്ക് ക്വാറന്റൈൻ ലംഘിച്ചയാൾക്ക് തായ്വാനിൽ രണ്ടര ലക്ഷം രൂപ (3500 ഡോളർ) പിഴ ചുമത്തി. ഫിലിപ്പീൻസിൽ നിന്നെത്തിയ തൊഴിലാളിയാണ് ക്വാറന്റൈൻ ലംഘിച്ചത് . ക്വാറന്റൈനിലിരിക്കെ മുറിയിൽ നിന്ന് പുറത്തിറങ്ങിയതിനാണ് പിഴ ചുമത്തിയതെന്ന് റിപ്പോർട്ട്. ഹോട്ടലിലെ ജീവനക്കാരാണ് സിസിടിവിയിലൂടെ ഇയാളെ മുറിയുടെ പുറത്ത് കണ്ടത്. ഇവർ ഉടൻ തന്നെ ആരോഗ്യമന്ത്രാലയവുമായി ബന്ധപ്പെട്ടു. തുടർന്ന് ആരോഗ്യവകുപ്പ് രണ്ടര ലക്ഷം രൂപ പിഴ ചുമത്തുകയായിരുന്നു.
തായ്വാനിലെ ക്വാറന്റൈൻ നിയമപ്രകാരം ആളുകൾ മുറിയിൽ നിന്ന് പുറത്തിറങ്ങാൻ പാടില്ല. എന്നാൽ ക്വാറന്റൈനിൽ ഇരിക്കുന്നവരുടെ ധാരണ ഹോട്ടൽ മുറിയിൽ നിന്ന് പുറത്തിറങ്ങിയാൽ പിഴ ചുമത്തില്ലെന്നാണെന്ന് ആരോഗ്യവകുപ്പ് പറഞ്ഞു. കഓസ്യൂംഗ് നഗരത്തിൽ 56 ക്വാറന്റൈൻ ഹോട്ടലുകളുണ്ട്. ഇതിലാകെ 3000 മുറികളുണ്ട്. വുഹാനിൽ 2019 ഡിസംബർ 31 ന് കോവിഡ് സ്ഥിരീകരിച്ചതു മുതൽ തായ്വാൻ അതീവ ജാഗ്രതയിലാണ്. കൃത്യമായ നിരീക്ഷണത്തിന് ശേഷം മാത്രമേ ആളുകളെ കടത്തിവിടുന്നുള്ളു. രണ്ട് കോടി 30 ലക്ഷം പേർ താമസിക്കുന്ന തായ്വാനിൽ ഇതുവരെ 716 പേർക്ക് മാത്രമാണ് കോവിഡ് സ്ഥിരീകരിച്ചത്.
