ചണ്ഡിഗഡ്: ഹരിയാന മുഖ്യമന്ത്രി മനോഹര്‍ ലാല്‍ ഖട്ടറിന്‍റെ റാലിക്കിടെ ആത്മാഹുതി ശ്രമം. സോണിപത് സ്വദേശിയായ രാജേഷ് കുമാര്‍ എന്നയാളാണ് ആത്മഹത്യയ്ക്കു ശ്രമിച്ചത്. 80 ശതമാനം പൊള്ളലേറ്റ ഇയാള്‍ റോഹ്തക്കിലെ ആശുപത്രിയില്‍ ചികിത്സയിലാണ്.
മകന് തൊഴിലില്ലാത്തതിനാലാണ് രാജേഷിനെ തീകൊളുത്താന്‍ പ്രേരിപ്പിച്ചതെന്നാണ് റിപ്പോര്‍ട്ടുകള്‍. ഡല്‍ഹിയിലെ ഹരിയാന ഭവനില്‍വച്ച് ദിവസങ്ങള്‍ക്ക് മുമ്പ് മുഖ്യമന്ത്രി ഖട്ടാറിനെ കണ്ടിരുന്നുവെന്നും മകന് തൊഴിലില്ലാത്ത കാര്യം പറഞ്ഞിരുന്നുവെന്നും ആശുപത്രിയില്‍വച്ച് രാജേഷ് മാധ്യമങ്ങളോട് പറഞ്ഞു. ജോലി നല്‍കാമെന്ന് മുഖ്യമന്ത്രി ഉറപ്പ് നല്‍കിയിരുന്നു ഗ്രൂപ്പ് ഡി പോസ്റ്റുകളിലേക്ക് റിക്രൂട്ട് ചെയ്യാമെന്ന് പറഞ്ഞെങ്കിലും തുടര്‍ നടപടിയുണ്ടായില്ലെന്നും രാജേഷ് അറിയിച്ചു.
മുഖ്യമന്ത്രിയുടെ വാഹനവ്യൂഹം കടന്നുപോകവെ ഇയാള്‍ എന്തോ ദ്രാവകം ഒഴിച്ചശേഷം തീ കൊളുത്തുകയായിരുന്നു. ജനങ്ങള്‍ക്കിടയിലൂടെ ഇയാള്‍ ഓടുന്നതിനിടെ രണ്ടു പേര്‍ക്കു പൊള്ളലേറ്റിട്ടുണ്ട്.
