തൃശൂർ: കായലോറിയിൽ ഒളിച്ചുകടത്താൻ ശ്രമിച്ച അഞ്ചുകിലോ കഞ്ചാവ് പിടികൂടി. തൃശൂർ ശക്തൻ മാർക്കറ്റിൽ നിന്നാണ് കഞ്ചാവ് പിടിച്ചെടുത്തത്. ലോറി ഡ്രൈവർ കട്ടപ്പന പാമ്പാടുംപാറ സ്വദേശി കറുപ്പുസ്വാമി(38)യെ അറസ്റ്റു ചെയ്തു. രഹസ്യവിവരം ലഭിച്ചതിന്റെ അടിസ്ഥാനത്തിലായിരുന്നു പരിശോധന.
കായ കൊണ്ടുവരുമ്പോള് ഇതിനുമുമ്പും ഇയാൾ ഇത്തരത്തിൽ കഞ്ചാവ് കടത്തിയിട്ടുണ്ടെന്നാണ് എക്സൈസിന് ലഭിച്ചിരിക്കുന്ന സൂചന.
കമ്പം തേനി ഭാഗത്തുനിന്നും തൃശൂരിലേക്കും എടപ്പാളിലേക്കും കായ കയറ്റിക്കൊണ്ടുപോകുന്ന ലോറിയുടെ കാബിനകത്തെ സീറ്റിനടിയിലാണ് പാക്കറ്റുകളിലാക്കി കഞ്ചാവ് ഒളിപ്പിച്ചിരുന്നത്.
എന്നാൽ ആർക്കുവേണ്ടിയാണ് കഞ്ചാവ് എത്തിച്ചതെന്നു വ്യക്തമായിട്ടില്ല. ആലുവ പോലീസിൽ ഇയാൾക്കെതിരെ മുമ്പ് ഒന്നേകാൽ കിലോ കഞ്ചാവ് കടത്തിയ സംഭവത്തിൽ കേസുണ്ട്.