സിനിമകള്ക്കെതിരെ വ്യാപകമായി കണ്ടുവരുന്ന ഡീഗ്രേഡിംഗ് പ്രവണതയെ കുറിച്ച് പ്രതികരിച്ച് നടന് മമ്മുട്ടി. സൂപ്പര്സ്റ്റാര് ചിത്രങ്ങളുടെ ഫാന്സ് ഷോകള്ക്കു പിന്നാലെ ആ ചിത്രങ്ങള്ക്കെതിരെ വ്യാപകമായി ഡീഗ്രേഡിംഗ് നടക്കുന്നതായ ഫിയോകിന്റെ അഭിപ്രായ പ്രകടനത്തിനു പിന്നാലെയാണ് അതേക്കുറിച്ചുള്ള ചോദ്യത്തിന് മമ്മൂട്ടിയുടെ പ്രതികരണം.
മമ്മുട്ടി നായകനാവുന്ന പുതിയ ചിത്രം ഭീഷ്മ പര്വ്വത്തിന്റം പ്രൊമോഷുമായി ബന്ധപ്പെട്ട വാര്ത്താ സമ്മേളനത്തിലാണ് മമ്മൂട്ടി ഈ വിഷയത്തില് പ്രതികരിച്ചത്. ഡീഗ്രേഡിംഗ് പണ്ടും ഉള്ള കാര്യമാണെന്നും എന്നാല് ബോധപൂര്വ്വം ഒരു സിനിമയെ തകര്ക്കാന് ശ്രമിക്കുന്നത് നല്ല പ്രവണതയല്ലെന്നും മമ്മൂട്ടി പ്രതികരിച്ചു. എന്നാല് തിയറ്ററുകളില് ഫാന്സിന് പ്രവേശനം നിഷേധിക്കുമെന്ന് താന് കരുതുന്നില്ലെന്നും മമ്മൂട്ടി പറഞ്ഞു.
മാര്ച്ച് മൂന്നിന് തിയറ്ററുകളിലെത്താനിരിക്കുന്ന ഭീഷ്!മ പര്വ്വത്തെക്കുറിച്ചും ചിത്രത്തില് താന് അവതരിപ്പിച്ച മൈക്കിള് എന്ന കഥാപാത്രത്തെക്കുറിച്ചും മമ്മൂട്ടി സംസാരിച്ചു. അമല് നീരദും മമ്മൂട്ടിയും ഒത്തുചേര്ന്ന ആദ്യ ചിത്രം ബിഗ് ബിയില് താന് അവതരിപ്പിച്ച ബിലാലില് നിന്നും മൈക്കിളിനെ വ്യത്യസ്തനാക്കാന് താന് പരമാവധി ശ്രമിച്ചിട്ടുണ്ടെന്ന് ഒരു ചോദ്യത്തിന് ഉത്തരമായി മമ്മൂട്ടി പറഞ്ഞു.
അന്തരിച്ച നെടുമുടി വേണുവും കെപിഎസി ലളിതയും കഥാപാത്രങ്ങളെ അവതരിപ്പിച്ചിട്ടുള്ള ചിത്രമാണ് ഭീഷ്മ പര്വ്വം. ഇനിയും ഒരുപാട് കഥാപാത്രങ്ങളെ അവതരിപ്പിക്കേണ്ടവരായിരുന്നു അവര്. അവര് മാത്രമല്ല മണ്മറഞ്ഞുപോയ ഒരുപാടുപേര്. അവരൊന്നും ഇനിയില്ല എന്നതിലാണ് സങ്കടം. നെടുമുടി വേണുവിനെയും കെപിഎസി ലളിതയെയും ചിത്രത്തിന്റെ ട്രെയ്ലറില് കണ്ടപ്പോള് പോലും ഇമോഷണല് ആയിപ്പോയെന്നും മമ്മൂട്ടി പ്രതികരിച്ചു.