നവാഗതനായ ജോഫിന്‍ ടി ചാക്കോ സംവിധാനം ചെയ്ത മമ്മൂട്ടി ചിത്രം ‘ദി പ്രീസ്റ്റി’ന്‍റെ ഔദ്യോഗിക റിലീസ് തിയതി പ്രഖ്യാപിച്ചു. മാര്‍ച്ച് 4 ആണ് ചിത്രത്തിന്‍റെ പുതിയ റിലീസ് തീയതി. ഫെബ്രുവരി നാലിന് റിലീസ് നിശ്ചയിച്ചിരുന്ന ചിത്രം സെക്കന്‍ഡ് ഷോ ഇല്ലാതെ ബിഗ് ബജറ്റ് ചിത്രങ്ങളുടെ റിലീസ് വേണ്ടെന്ന നിര്‍മ്മാതാക്കളുടെ തീരുമാനത്തെ തുടര്‍ന്നാണ് നീട്ടിയത്. മമ്മൂട്ടിക്കൊപ്പം മഞ്ജു വാര്യര്‍ ആദ്യമായി അഭിനയിക്കുന്ന ചിത്രമാണ് ‘ദി പ്രീസ്റ്റ്’.
നിഖില വിമല്‍, ശ്രീനാഥ് ഭാസി, സാനിയ അയ്യപ്പന്‍, ജഗദീഷ്, മധുപാല്‍ തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ജോഫിന്‍ ടി ചാക്കോയുടെ കഥയ്ക്ക് ശ്യാം മേനോനും ദീപു പ്രദീപും ചേര്‍ന്നാണ് തിരക്കഥയൊരുക്കിയിരിക്കുന്നത്. രാഹുല്‍ രാജ് സംഗീതം പകരുന്ന ചിത്രത്തിന്‍റെ ഛായാഗ്രഹണം അഖില്‍ ജോര്‍ജ്ജ് ആണ്. ആന്‍റോ ജോസഫ് ഫിലിം കമ്പനിയുടെയും ആര്‍ ഡി ഇല്യൂമിനേഷന്‍സിന്‍റെയും ബാനറില്‍ ആന്‍റോ ജോസഫും ബി ഉണ്ണികൃഷ്ണനും ചേര്‍ന്നാണ് ചിത്രം നിര്‍മ്മിക്കുന്നത്.
തിയറ്റർ തുറന്നതോടെ മൂന്ന് മലയാള ചിത്രങ്ങളാണ് പ്രദർശനത്തിനെത്തിയത്. പ്രജേഷ് സെൻ സംവിധാനം ചെയ്ത് ജയസൂര്യ നായകനായ വെള്ളം, ഖാലിദ് റഹ്മാന്‍ സംവിധാനം ചെയ്ത ‘ലവ്’, നവാഗത സംവിധായിക കാവ്യ പ്രകാശിന്‍റെ ‘വാങ്ക്’, അമ്പലപ്പുഴ രാധാകൃഷ്ണന്‍റെ ‘ഇവള്‍ ഗോപിക’ എന്നിവയാണ് പ്രദർശനത്തിനെത്തിയത്. ക്രിസ്റ്റഫര്‍ നോളന്‍ ചിത്രം ‘ടെനറ്റും’ കേരളത്തിലെ തിയറ്ററുകളില്‍ പ്രദര്‍ശനത്തിനുണ്ട്.
