ജയറാമിന്റെയും പാർവതിയുടെയും മക്കൾ കാളിദാസും മാളവികയും മലയാളികൾക്ക് സുപരിചിതരാണ്. കാളിദാസ് മലയാളം,തമിഴ് സിനിമകളിൽ സജീവമായപ്പോൾ മകൾ മാളവിക മോഡലിങ്ങിലും സ്പോർട്സിലുമാണ് കൂടുതൽ താല്പര്യം കാണിച്ചത്. ഇപ്പോഴിതാ തന്റെ ഒരു ചിത്രത്തിന് താഴെ വന്ന അശ്ലീല കമന്റിനെതിരെ പ്രതികരിച്ചിരിക്കുകയാണ് മാളവിക. സഹോദരൻ കാളിദാസിനും ജയറാമിനും ഒപ്പമുള്ള തന്റെ ഒരു പഴയ ഫോട്ടോ മാളവിക സമൂഹമാധ്യമത്തിൽ പങ്കുവെച്ചിരുന്നു. ജയറാമിന്റെ മുകളിൽ ഇരുന്ന് കളിക്കുന്ന അവരുടെ ചെറുപ്പകാലത്തെ ഫോട്ടോയായിരുന്നു അത്. എന്നാല്‍ ഒരാള്‍ ഫോട്ടോക്ക് മോശം കമന്റുമായി എത്തി. ഇതേ വസ്‍ത്രത്തില്‍ ചിത്രം റിക്രിയേറ്റ് ചെയ്ത് കാണാൻ ആഗ്രഹിക്കുന്നു എന്നായിരുന്നു കമന്റ്. ഇതിനെതിരെയാണ് മാളവിക പ്രതികരിച്ചത്.
‘ഒരു കള്ളപ്പേരിന് പിന്നിൽ ഒളിച്ചിരുന്ന് അനുചിതമായ / അസ്വസ്തപ്പെടുത്തുന്ന കമന്റുകൾ എഴുതിവിടാൻ എളുപ്പമാണ്. എന്നാൽ ഐഡന്റിറ്റി വെളിപ്പെടുത്തി ഇതെന്റെ മുഖത്ത് നോക്കി പറയാൻ ധൈര്യമുണ്ടോ?’ എന്നായിരുന്നു മാളവികയുടെ മറുപടി.താരത്തിന്റെ മറുപടി വന്നതോടെ കമന്റ് ഇട്ടയാൾ അത് ഡിലീറ്റ് ആക്കി. പക്ഷെ മറുപടിയുടെ സ്‍ക്രീൻ ഷോട്ട് മാളവിക തന്റെ സോഷ്യൽ മീഡിയയിലൂടെ ഷെയർ ചെയ്തതു. അടുത്തിടെ ഒരു അഭിനയക്കളരിയില്‍ പങ്കെടുത്ത മാളവികയുടെ ചിത്രങ്ങള്‍ സാമൂഹ മാധ്യമങ്ങളില്‍ വൈറലായിരുന്നു. പോണ്ടിച്ചേരിയിലെ ആദിശക്തി തിയേറ്റര്‍ നടത്തിയ അഭിനയക്കളരിയിലാണ് മാളവിക പങ്കെടുത്തത്. ഇതോടെ ചക്കിയുടെ സിനിമാ അരങ്ങേറ്റം ഉടനുണ്ടാകും എന്നാണ് ആരാധകർ പ്രതീക്ഷിക്കുന്നത്.
