മലപ്പുറം: കേരളത്തില് ഇന്ന് ഏറ്റവും കൂടുതല് കൊവിഡ് രോഗികള് റിപ്പോര്ട്ട് ചെയ്തത് മലപ്പുറത്താണ്. ഇന്ന് ആരോഗ്യമേഖലയില് പ്രവര്ത്തിക്കുന്ന രണ്ട് പേര്ക്കുള്പ്പടെ 1,610 പേര്ക്ക് കൊവിഡ് സ്ഥിരീകരിച്ചു. 11.66 ശതമാനമാണ് ജില്ലയിലെ ഈ ദിവസത്തെ ടെസ്റ്റ് പോസിറ്റീവിറ്റി നിരക്ക്. 1,570 പേര്ക്ക് നേരിട്ടുള്ള സമ്പര്ക്കത്തിലൂടെയാണ് രോഗം ബാധിച്ചത്.
18 പേര്ക്ക് വൈറസ് ബാധിച്ചതിന്റെ ഉറവിടം കണ്ടെത്താനായിട്ടില്ല. കൂടാതെ വിദേശത്ത് നിന്നെത്തിയ ഒരാള്ക്കും ഇതര സംസ്ഥാനങ്ങളില് നിന്നെത്തിയ 19 പേര്ക്കും രോഗം സ്ഥിരീകരിച്ചിട്ടുണ്ട്. 1,045 പേര് കോവിഡ് മുക്തരായതോടെ ജില്ലയില് 3,22,598 പേരാണ് രോഗം ഭേദമായി സാധാരണ ജീവിതത്തിലേക്ക് മടങ്ങിയെത്തിയത്.
32,663 പേരാണ് ജില്ലയില് നിലവില് നിരീക്ഷണത്തില് കഴിയുന്നത്. 12,520 പേര് വിവിധ കേന്ദ്രങ്ങളില് ചികിത്സയില് കഴിയുന്നു. കോവിഡ് പ്രത്യേക ചികിത്സാ കേന്ദ്രങ്ങളായ ആശുപത്രികളില് 632 പേരും കോവിഡ് ഫസ്റ്റ് ലൈന് ട്രീറ്റ്മെന്റ് സെന്ററുകളില് 264 പേരും 124 പേര് കോവിഡ് സെക്കന്റ് ലൈന് ട്രീറ്റ്മെന്റ് സെന്ററുകളിലുമാണ്.
തദ്ദേശസ്വയംഭരണ സ്ഥാപനങ്ങള്ക്കു കീഴിലുള്ള പ്രത്യേക താമസ കേന്ദ്രങ്ങളായ ഡൊമിസിലിയറി കെയര് സെന്ററുളില് 447 പേരും ശേഷിക്കുന്നവര് വീടുകളിലും നിരീക്ഷണത്തില് കഴിയുന്നു. ജില്ലയില് ഇതുവരെ 1,161 പേരാണ് കോവിഡ് ബാധിച്ച് മരണപ്പെട്ടത്.