രാജ്യത്തെ വളരുന്ന എസ്യുവി പ്രിയത്തില്‍ നിന്ന് എസ്യുവി ഭീമനായ മഹീന്ദ്ര ശരിക്കും പ്രയോജനം നേടിയിട്ടുണ്ട്. XUV700, സ്‍കോര്‍പ്പിയോ എൻ എന്നിവയുടെ വിൽപ്പന കുതിച്ചുയർന്നു. മഹീന്ദ്രയുടെ അടുത്ത എസ്യുവി അതിന്റെ നിരയിലെ ഏറ്റവും വലുതായിരിക്കും. നമ്മൾ ഏത് എസ്‌യുവിയെക്കുറിച്ചാണ് സംസാരിക്കുന്നതെന്ന് മനസിലായോ? ബൊലേറോ നിയോയുടെ ഒമ്പത് സീറ്റർ പതിപ്പായ ബൊലേറോ നിയോ പ്ലസിനെക്കുറിച്ചാണ് പറഞ്ഞുവരുന്നത്. ഇതാ വരാനിരിക്കുന്ന ഏറ്റവും വലിയ മഹീന്ദ്ര എസ്‌യുവിയെക്കുറിച്ച് സംസാരിക്കാം.
അടുത്തിടെ ബൊലേറോ നിയോ പ്ലസ് പൂനെയിൽ പരീക്ഷണ ഓട്ടത്തിനിടെ ശ്രദ്ധയിൽപ്പെട്ടിരുന്നു. ഈ ചാര ഷോട്ടുകളിൽ, കാറിന്റെ മുൻവശത്ത് കാര്യമായ മാറ്റങ്ങളൊന്നും ഉണ്ടായിരുന്നില്ല. ഇതിന് ഒരു വേറിട്ട ലോഗോ ഉണ്ടായിരുന്നു. അത് പുതിയ ട്വിൻ പീക്ക് ലോഗോ ആകാൻ സാധ്യതയുണ്ട്. വശങ്ങള്‍ പരിശോധിക്കുകയാണെങ്കില്‍ വിപുലീകൃത രൂപത്തിലുള്ള മൂന്നാമത്തെ വരി വ്യക്തമാണ്. പിൻഭാഗത്ത്, വ്യത്യസ്തമായ ബമ്പർ ഡിസൈനോടുകൂടിയ കൂടുതൽ വൃത്താകൃതിയിലുള്ള രൂപകൽപ്പനയുണ്ട്. ബൊലേറോ നിയോയിൽ നിന്നുള്ള ടെയിൽഗേറ്റ് ഘടിപ്പിച്ച സ്പെയർ ടയർ ഡിസൈൻ ഇത് നിലനിർത്തുന്നു.
ബൊലേറോ നിയോ പ്ലസിന് ബൊലേറോ നിയോയെക്കാൾ കരുത്തുള്ള എഞ്ചിൻ ആവശ്യമാണ്. അതുകൊണ്ടു തന്നെ സ്കോർപിയോ, XUV700 എന്നിവ പോലെ 2.2 ലിറ്റർ ഡീസൽ എഞ്ചിനുമായി ഇത് വരാം. എന്നിരുന്നാലും, ഇത് 130 ബിഎച്ച്പിയും 300 എൻഎം ടോർക്കും ഉൽപ്പാദിപ്പിക്കാൻ കഴിവുള്ള വ്യത്യസ്തമായ ട്യൂണിംഗില്‍ ആയിരിക്കും എത്തുന്നത്. ബൊലേറോ നിയോ പോലെ, ഇതില്‍ ഓട്ടോമാറ്റിക് ഗിയർബോക്സ് ഓപ്ഷൻ നഷ്‍ടമായേക്കും. കുറച്ച് ഓഫ്-റോഡിംഗ് കഴിവുകൾക്കായി എംടിടി സാങ്കേതികവിദ്യയും ഇതിന് ലഭിക്കും.
ബൊലേറോ നിയോ പ്ലസിന്റെ ഇന്റീരിയർ ലേഔട്ട് ബൊലേറോ നിയോയുമായി ഏറെക്കുറെ സാമ്യമുള്ളതായിരിക്കും. അതിനാൽ മൂന്നാം നിരയിൽ ഹമ്പ് സീറ്റുകളുള്ള ബീജ് ഇന്റീരിയറുകൾ ഉമ്ടായിരിക്കും. ഇതിന് 7.0-ഇഞ്ച് ഇൻഫോടെയ്ൻമെന്റ്, എഞ്ചിൻ സ്റ്റാർട്ട്-സ്റ്റോപ്പ്, മാനുവൽ എയർ കണ്ടീഷനിംഗ്, പവർ വിൻഡോകള്‍ തുടങ്ങിയവ ലഭിക്കും. സുരക്ഷയുടെ കാര്യത്തിൽ, ഇതിന് ഇരട്ട എയർബാഗുകളും എബിഎസ് സ്റ്റാൻഡേർഡും ലഭിക്കും.
ഈ വർഷം അവസാനത്തോടെ മഹീന്ദ്ര ബൊലേറോ നിയോ പ്ലസ് പുറത്തിറക്കുമെന്ന് പ്രതീക്ഷിക്കുന്നു. വാഹനത്തിന് 12 ലക്ഷം രൂപ മുതൽ ആരംഭിക്കുമെന്ന് പ്രതീക്ഷിക്കുന്നു. ഇന്ത്യൻ വിപണിയിൽ ഇതിന് നേരിട്ടുള്ള എതിരാളികളില്ല, പ്രാഥമികമായി ഒരു ഫ്ലീറ്റ് വാഹനമായിട്ടായിരിക്കും ഇത് ലക്ഷ്യമിടുന്നത്.
