തൃപ്പൂണിത്തുറ: പെട്രോള്‍ പമ്പിന്റെ മേല്‍ക്കൂരയില്‍ തലയിടിച്ച് ആനയ്ക്ക് പരിക്ക്. തൃപ്പൂണിത്തുറയിലാണ് സംഭവം. ഉത്സവം കഴിഞ്ഞ് ആനയെ ലോറിയില്‍ തൃശ്ശൂരിലേക്ക് കൊണ്ടുപോവുകയായിരുന്നു. എന്നാല്‍ ആന ലോറിയില്‍ ഉള്ള കാര്യം ഓര്‍ക്കാതെ ഡ്രൈവര്‍ പെട്രോള്‍ പമ്പിലേക്ക് വണ്ടി ഓടിച്ച് കയറ്റിയപ്പോഴാണ് അപകടം സംഭവിച്ചത്. തൃശിവപേരൂര്‍ കര്‍ണന്‍ എന്ന ആനയ്ക്കാണ് പരിക്കേറ്റത്. ആനയെ കയറ്റിയ ലോറി ഡ്രൈവറെ പൊലീസ് കസ്റ്റഡിയിലെടുത്തു. ആനയുടെ തല ഇടിക്കുന്ന ദൃശ്യങ്ങളും പുറത്തുവന്നിട്ടുണ്ട്.
ഇന്ന് രാവിലെ പത്തരയോടെയാണ് സംഭവം നടക്കുന്നത്. മരട് തുരുത്തിക്കാട് അമ്പലത്തിലെ ഉത്സവം കഴിഞ്ഞ് മടങ്ങുന്ന വഴിയാണ് അപകടം സംഭവിച്ചത്. ആനയുടെ തലയ്ക്ക് സാരമായി പരുക്കേറ്റിട്ടുണ്ട്. സമീപത്തുള്ളവര്‍ ബഹളം വച്ചതോടെ ഡ്രൈവര്‍ വണ്ടി നിര്‍ത്തുകയായിരുന്നു. ആനയുടെ പരുക്ക് ഗുരുതരമാണോ എന്നതിനെ കുറിച്ച് വെറ്റിനറി ഡോക്ടര്‍മാര്‍ പരിശോധിച്ച ശേഷം മാത്രമെ പറയാന്‍ കഴിയുകയുള്ളുവെന്ന് പാപ്പാന്‍മാര്‍ പറയുന്നു.
രാവിലെ അപകടം നടന്നിട്ടും ഉച്ചകഴിഞ്ഞാണ് സംഭവസ്ഥലത്ത് ഡോക്ടര്‍മാര്‍ എത്തിയതെന്ന് നാട്ടുകാര്‍ പറയുന്നു. അതുവരെ ആനയെ തൃപ്പൂണിത്തുറയിലുള്ള ഒരു പറമ്പില്‍ തളച്ചിട്ടിരിക്കുകയായിരുന്നു.
