ഗോവ അന്താരാഷ്ട്ര ചലച്ചിത്രമേളയില് മികച്ച നടനുള്ള പുരസ്കാരം ചെമ്പന് വിനോദ് ജോസിന്. മികച്ച സംവിധായകനുള്ള രജത മയൂരം ലിജോജോസ് പെല്ലിശേരിക്കും ലഭിച്ചു.
ലോകത്തിന്റെ വിവിധ ഭാഗങ്ങളില് നിന്നുമെത്തിയ ആഗോള നിലവാരമള്ള ചിത്രങ്ങളോട് മാറ്റുരച്ചാണ് ലിജോയുടെ ഈമയൗ മികച്ച നടനും സംവിധായകനുമുള്ള പുരസ്കാരങ്ങള് സ്വന്തമാക്കി കേരളത്തിന്റെ അഭിമാനമായി മാറിയത്. ആദ്യമായാണു മലയാളികള്ക്ക് ഈ രണ്ടു പുരസ്കാരങ്ങളും ഒരുമിച്ചു ലഭിക്കുന്നത്.
സെര്ജി ലോസ്നിറ്റ്സ സംവിധാനം ചെയ്ത യുക്രൈന്-റഷ്യന് ചിത്രം ഡോണ്ബാസിനാണ് മികച്ച ചിത്രത്തിനുള്ള സുവര്ണമയൂരം. ഉക്രൈന് സംഘര്ഷത്തിന്റെ കാണാപ്പുറങ്ങളിലേക്ക് വെളിച്ചം വീശുന്ന ചിത്രം മേളയില് വലിയ ചര്ച്ചയായിരുന്നു. മികച്ച നടിക്കുള്ള പുരസ്കാരം വെന് ട്രീസ് ഫാള് എന്ന ചിത്രത്തിലെ അഭിനയത്തിന് അനസ്റ്റസ്യ പുസ്റ്റോവിറ്റ് സ്വന്തമാക്കി. മില്കോ ലാസ്റോവിന്റെ അഗ എന്ന ചിത്രത്തിനാണ് പ്രത്യേക ജൂറി പുരസ്കാരം.