കൊച്ചി: പൗരത്വനിയമത്തിനെതിരെ ലത്തീന്‍ സഭയിലെ ദേവാലയങ്ങളില്‍ ഇടയലേഖനം. മതത്തിന്റെ പേരില്‍ ജനങ്ങളെ വിഭജിക്കുന്നതാണ് പൗരത്വ ഭേദഗതി ബില്ലെന്ന് ലത്തീന്‍സഭ പറഞ്ഞു. ഇടയലേഖനം ലത്തീന്‍ സഭയുടെ 12 രൂപതകളിലെ പള്ളികളില്‍ വായിച്ചു.
നിയമഭേദഗതി ഇസ്ലാം വിഭാഗത്തിന്റെ മാത്രം പ്രശ്‌നമല്ല. ഭരണഘടനയെ ബാധിക്കുന്നതാണ്. മതരാഷ്ട്രം സൃഷ്ടിക്കാനുള്ള ശ്രമമാണെന്നും അതിനാല്‍ ഒരുമിച്ചുള്ള പ്രതിഷേധം ആവശ്യമാണെന്നും ലത്തീന്‍സഭയുടെ ഇടയലേഖനം പറയുന്നു. പ്രത്യേക മതവിഭാഗത്തോട് വിവേചനം പ്രകടിപ്പിക്കുന്നത് ഭരണഘടനയുടെ തത്വങ്ങള്‍ക്ക് എതിരായതിനാല്‍ ഇത് പിന്‍ വലിക്കണമെന്നും ഇടയ ലേഖനത്തില്‍ പറയുന്നുണ്ട്.
ആംഗ്ലോ ഇന്ത്യന്‍ പ്രതിനിധികളെ നിയമസഭകളില്‍ നിന്നും ലോക്‌സഭകളില്‍ നിന്നും ഒഴിവാക്കിയത് ക്രൈസ്തവരോടുള്ള മതപരമായ വിവേചനവും അനീതിയുമാണെന്നും ഇടയലേഖനത്തില്‍ പറയുന്നു.
