കാബൂള്‍: അഫ്ഗാനിസ്ഥാന്റെ തലസ്ഥാനമായ കാബൂളില്‍ വിദേശ ഗസ്റ്റ്ഹൗസിന് നേരെ ബോംബാക്രമണം. വടക്കന്‍ കാബൂളിലെ അമേരിക്കയുടെ ബഗ്രാം വ്യോമ താവളത്തിന് സമീപത്ത് വിദേശികള്‍ താമസിക്കുന്ന ഗസ്റ്റ് ഹൗസിന് സമീപത്താണ് സംഭവം. തിങ്കളാഴ്ച പുലര്‍ച്ചെയാണ് സ്‌ഫോടനമുണ്ടായത്.
സംഭവത്തില്‍ ആര്‍ക്കും പരുക്കേറ്റിട്ടില്ലെന്നാണ് വിവരങ്ങള്‍. ട്രക്ക് ബോംബ് സ്‌ഫോടനമാണ് ഉണ്ടായതെന്ന് സുരക്ഷാ സേന അറിയിച്ചു. താലിബാനാണ് ആക്രമണത്തിന് പിന്നിലെന്ന് സംശയിക്കുന്നതായി ഉന്നത പൊലീസ് ഉദ്യോഗസ്ഥര്‍ അറിയിച്ചു. സ്‌ഫോടനത്തെ തുടര്‍ന്ന് സമീപത്തെ നിരവധി കെട്ടിടങ്ങള്‍ക്ക് തകരാര്‍ സംഭവിച്ചിട്ടുണ്ട്.
അതേസമയം, തങ്ങളുടെ പോരാളികള്‍ക്ക് ഗസ്റ്റ്ഹൗസിലേക്ക് കടക്കാന്‍ വേണ്ടിയാണ് സ്‌ഫോടനം നടത്തിയതെന്നും നൂറുക്കണക്കിന് അമേരിക്കക്കാര്‍ കൊല്ലപ്പെട്ടതായും താലിബാന് അറിയിച്ചതായി എഎഫ്പി റിപ്പോര്‍ട്ട് ചെയ്തു
