കുവൈത്ത് സിറ്റി: പശ്ചിമേഷ്യയില്‍ ഹരിതവത്കരണത്തിനുള്ള എല്ലാ ശ്രമങ്ങളെയും കുവൈത്ത് പിന്തുണക്കും. സൗദിയിലെ റിയാദില്‍ ഹരിത പശ്ചിമേഷ്യ സമ്മേളനം നടക്കുന്ന പശ്ചാത്തലത്തിലാണ് പ്രധാനമന്ത്രി ശൈഖ് സബാഹ് ഖാലിദ് അല്‍ ഹമദ് അസ്സബാഹിന്റെ അധ്യക്ഷതയില്‍ ചേര്‍ന്ന കുവൈത്ത് മന്ത്രിസഭ പിന്തുണ പ്രഖ്യാപിച്ചത്. സുസ്ഥിരമായ പ്രകൃതി സംരക്ഷണം ഏറെ പ്രധാനപ്പെട്ടതാണ്.
സഹോദര രാജ്യമായ സൗദി ഈ ദിശയില്‍ നടത്തുന്ന ഇടപെടലുകളെ ബഹുമാനത്തോടെ കാണുന്നു. പരിസ്ഥിതി സംരക്ഷണം, പുനരുപയോഗ ഊർജ്ജം മരുഭൂമിയിലെ സസ്യസംരക്ഷണം തുടങ്ങിയവ മേഖലയിലെ ജനങ്ങളുടെ സുഗമമായ ജീവിതത്തിന് അത്യാവശ്യമാണ്. കാലാവസ്ഥ വ്യതിയാനത്തെ ഗൗരവത്തിലെടുക്കണം. ഭാവിതലമുറയെ കൂടി കണ്ടാണ് ഈ മേഖലയില്‍ പ്രവര്‍ത്തിക്കേണ്ടത്. റിയാദില്‍ നടക്കുന്ന ഗ്രീന്‍ ഇനീഷ്യേറ്റിവ് സമ്മിറ്റിന് ഈ വിഷയങ്ങളില്‍ ശ്രദ്ധേയമായ കാഴ്ചപ്പാടും പ്രചോദനവും നല്‍കാന്‍ കഴിയുമെന്ന് മന്ത്രിസഭ വിലയിരുത്തി.
