കുവൈറ്റ് സിറ്റി: കുവൈറ്റ് സര്‍വകലാശാലയുടെ കീഴിലുള്ള എല്ലാ വിദ്യാര്‍ഥികള്‍ക്കുമുള്ള എല്ലാ പരീക്ഷകളും ഓണ്‍ലൈനില്‍ ആയിരിക്കുമെന്ന് ഉന്നത വിദ്യാഭ്യാസ മന്ത്രാലയം. വിദ്യാഭ്യാസ സമിതി തലവന്‍ ഡോ. ഹമദ് അല്‍ മാത്തറാണ് ഇക്കാര്യം അറിയിച്ചത്. കൊറോണ വൈറസ് പടരാതിരിക്കാന്‍ 12 മണിക്കൂര്‍ ഭാഗിക കര്‍ഫ്യൂ ഉള്‍പ്പെടെയുള്ള പുതിയ നടപടികള്‍ കുവൈറ്റ് നടപ്പിലാക്കുന്നതിനാല്‍ മാര്‍ച്ച് 7 ഞായറാഴ്ച മുതല്‍ ഒരു മാസത്തേയ്ക്ക് ഈ തീരുമാനം നടപ്പാക്കും.
കൊവിഡ് മഹാമാരി ആരംഭിച്ചതു മുതല്‍ എല്ലാ ക്ലാസുകളും ഓണ്‍ലൈനില്‍ നടത്തിയിട്ടുണ്ടെങ്കിലും കുവൈറ്റ് സര്‍വകലാശാലയിലെ ചില കോളജുകള്‍ അതാത് പ്രൊഫസറുടെ തീരുമാനത്തെ അടിസ്ഥാനമാക്കി വ്യക്തിഗത പരീക്ഷകള്‍ നടത്തുന്നുണ്ട്.
പുതിയ ഉത്തരവ് ലംഘിക്കുന്നവര്‍ക്ക് വിദ്യാഭ്യാസ സമിതിയുടെ പിഴകള്‍ നേരിടേണ്ടി വരുമെന്ന് പുതിയ തീരുമാനം പറയുന്നു. സ്‌കൂളുകള്‍ ഉള്‍പ്പെടെ എല്ലാ സര്‍വകലാശാലകളും കോളജുകളും പഠനം ഓണ്‍ലൈനിലാക്കിയിട്ട് ഒരു വര്‍ഷത്തിലേറെയായി. അയല്‍രാജ്യമായ ഗള്‍ഫ് രാജ്യങ്ങള്‍ സ്‌കൂള്‍ പാഠ്യപദ്ധതിയിലേക്ക് തിരിച്ചുവന്നെങ്കിലും കുവൈറ്റ് ഇതുവരെ തിരിച്ചുവന്നിട്ടില്ല.
