കുവൈറ്റ് സിറ്റി: കുവൈറ്റില്‍ വീട്ടുജോലിക്കാരിയെ സ്പോണ്‍സറുടെ വീടിനുള്ളില്‍ തൂങ്ങി മരിച്ച നിലയില്‍ കണ്ടെത്തി. കുവൈറ്റിലെ അല്‍ വഹയിലുള്ള സ്പോണ്‍സറുടെ വീട്ടില്‍ വെച്ചാണ് 31 കാരിയായ ഫിലിപിനോ സ്വദേശി തിങ്കളാഴ്ച ആത്മഹത്യ ചെയ്തത്. കയര്‍ ഉപയോഗിച്ച് മുറിയില്‍ തൂങ്ങി മരിക്കുകയായിരുന്നെന്ന് ഒരു സുരക്ഷാ ഉദ്യോഗസ്ഥന്‍ പറഞ്ഞു. സംഭവത്തെ കുറിച്ചുള്ള വിവരം ലഭിച്ച ഉടന്‍ പോലീസ് ഉദ്യോഗസ്ഥരും ഫോറന്‍സിക് വിദഗ്ധരും അടങ്ങുന്ന സംഘം സംഭവസ്ഥലത്തെത്തി.
വീട്ടമ്മയ്ക്ക് പ്രത്യേകിച്ച് പ്രശ്നങ്ങളൊന്നും ഉണ്ടായിരുന്നില്ലെന്ന് സ്പോണ്‍സര്‍ പോലീസിനോട് പറഞ്ഞു. മൃതദേഹം പോസ്റ്റ്മാര്‍ട്ടത്തിനായി കൊണ്ടുപോയി. ആത്മഹത്യയിലേക്ക് നയിച്ച കാരണങ്ങളെ കുറിച്ച് പോലീസ് അന്വേഷണം ആരംഭിച്ചു.
സമാന സംഭവത്തില്‍ ഫിലിപ്പിനോ സ്വദേശിയായ മറ്റൊരു വീട്ടുജോലിക്കാരി സ്പോണ്‍സറുടെ വീട്ടില്‍ ആത്മഹത്യ ചെയ്തിരുന്നു. കുവൈറ്റ് തലസ്ഥാനത്തെ അബ്ദുല്ല അല്‍ സേലം പരിസരത്തുള്ള സ്പോണ്‍സറുടെ വീട്ടില്‍ മൂന്ന് ദിവസം മുമ്പാണ് സംഭവം. വീട്ടുജോലിക്കാരിയെ കാണാതായതിനെ തുടര്‍ന്ന് സുരക്ഷ- അഗ്‌നിശമന സേനാംഗങ്ങള്‍ നടത്തിയ തെരച്ചിലില്‍ മൃതദേഹം ബാത്ത്റൂം തല്ലി തുറന്ന് കണ്ടെത്തി. ഫോറന്‍സിക് മെഡിക്കല്‍ പരിശോധനയ്ക്കായി മൃതദേഹം ആശുപത്രിയില്‍ എത്തിച്ചു.
