കുവൈറ്റിലേക്കുള്ള പ്രവേശന വിലക്ക് വീണ്ടും നീട്ടി

കുവൈറ്റ് സിറ്റി: കുവൈറ്റില്‍ വിദേശികള്‍ക്കുള്ള പ്രവേശന വിലക്ക് വീണ്ടും നീട്ടി. ഇന്നു തുടങ്ങി വിദേശികള്‍ക്ക് പ്രവേശനം നല്‍കാനുള്ള തീരുമാനം വ്യോമയാന വകുപ്പ് റദ്ദാക്കുകയായിരുന്നു. ആരോഗ്യമന്ത്രാലയത്തിന്റെ നിര്‍ദേശമനുസരിച്ചാണ് വ്യോമയാന മന്ത്രാലയത്തിന്റെ നടപടി. ഇനിയൊരു അറിയിപ്പുണ്ടാകുന്നത് വരെ കുവൈറ്റില്‍ വിദേശികള്‍ക്ക് പ്രവേശനം നല്‍കില്ല. കൊവിഡ് പടരുന്ന പശ്ചാത്തലം വിലയിരുത്തിയാണ് തീരുമാനം.

അതേസമയം സ്വദേശികള്‍, അവരുടെ അടുത്ത ബന്ധുക്കള്‍, നയതന്ത്ര ഉദ്യോഗസ്ഥര്‍, കുടുംബാംഗങ്ങള്‍ ഗാർഹിക തൊഴിലാളികള്‍, പൊതു-സ്വകാര്യ മെഡിക്കല്‍ രംഗത്ത് ജോലിചെയ്യുന്നവര്‍ അവരുടെ കുടുംബം എന്നിവർക്ക് പ്രവേശനം നല്‍കും.

ഏഴ് ദിവസം ഹോട്ടലിലും ഏഴ് ദിവസം വീട്ടിലുമാണ് ക്വാറന്റീനില് കഴിയേണ്ടത്. നേരത്തെ ഫെബ്രുവരി ഏഴു മുതല്‍ രണ്ടാഴ്ചത്തേക്കാണ് കൊവിഡ് പ്രതിരോധ നടപടികളുടെ ഭാഗമായി വിലക്ക് ഏർപ്പെടുത്തിയിരുന്നത്. കൃത്യമായ മാനദണ്ഡങ്ങളോടെ ഫെബ്രുവരി 21 മുതൽ എല്ലാ രാജ്യങ്ങളില്‍സനിന്നുള്ള യാത്രക്കാര്‍ക്കും നേരിട്ട് പ്രവേശിക്കാന്‍ വ്യോമയാന അധികൃതര്‍ നേരത്തെ അനുമതി നൽകിയിരുന്നു. ഈ തീരുമാനമാണ് റദ്ദാക്കിയത്.

 

Top