തിരുവനന്തപുരം: രാഷ്ട്രീയ പകപോക്കലിനായി മുസ്ലിം ലീഗ് പള്ളികളെ ഉപയോഗിക്കുന്നതായി കെ ടി ജലീല്‍ എം എല്‍ എ. ആരാധനാലയങ്ങള്‍ രാഷ്ട്രീയ സമരങ്ങളുടെ വേദിയാക്കി മാറ്റരുത്. ലീഗ് ജനറല്‍ സെക്രട്ടറിയുടെ പ്രസ്താവന ഹൈദരാലി തങ്ങള്‍ ഇടപെട്ട് പിന്‍വലിപ്പിക്കണം. മുസ്ലിം ലീഗ് രാഷ്ട്രീയ പാര്‍ട്ടിയാണ് മത സംഘടനയല്ലെന്നും കെ ടി ജലീല്‍ എം എല്‍ എ പ്രതികരിച്ചു.
ലീഗ് രാഷ്ട്രീയ പാര്‍ട്ടിയാണ് മത സംഘടന അല്ല. ലീഗ് ജനറല്‍ സെക്രട്ടറി പി.എം.എ സലാം നടത്തിയ പ്രസ്താവന ഹൈദരലി തങ്ങള്‍ ഇടപെട്ട് പിന്‍വലിപ്പിക്കണം. പള്ളികള്‍ രാഷ്ട്രീയ പ്രതിഷേധങ്ങള്‍ക്ക് വേദിയാക്കരുത്. ഇന്ന് ലീഗ് ചെയ്താല്‍ നാളെ ബിജെപി ക്ഷേത്രങ്ങളില്‍ സര്‍ക്കാര്‍ വിരുദ്ധ പ്രചരണം നടത്തും. മുസ്ലിം ലീഗിന് കീഴില്‍ പള്ളികള്‍ ഇല്ല എന്നതെങ്കിലും ഓര്‍ക്കണം. ആരാധനാലയങ്ങള്‍ രാഷ്ട്രീയ സമരങ്ങളുടെ വേദി ആക്കി മാറ്റരുതെന്നും കെ.ടി.ജലീല്‍ ആവശ്യപ്പെട്ടു.
അതേസമയം, സമസ്തയുടെ കാര്യങ്ങളില്‍ കെ ടി ജലീല്‍ എംഎല്‍എ ഇടപെടേണ്ടെന്ന് അബ്ദുല്‍ സമദ് പൂക്കോട്ടൂര്‍ അറിയിച്ചു. വഖഫ് ബോര്‍ഡ് നിയമനങ്ങള്‍ പി എസ്സിക്ക് വിട്ടതിനെതിരെ പള്ളികളില്‍ പ്രചാരണം നടത്തുമെന്ന് സമസ്ത അറിയിച്ചു. വിശ്വാസികളെ ബോധവല്‍ക്കരിക്കുക എന്ന കടമ നിര്‍വഹിക്കുമെന്ന് അബ്ദുള്‍ സമദ് പൂക്കോട്ടൂര്‍ കൂട്ടിച്ചേര്‍ത്തു.
വഖഫ് ബോര്‍ഡ് നിയമനം പിഎസ്‌സിക്ക് വിട്ടതുള്‍പ്പെടെയുള്ള നടപടികള്‍ക്കെതിരെ വെള്ളിയാഴ്ച പള്ളികളില്‍ പ്രചാരണം നടത്തുമെന്ന് മുസ്ലിം ലീഗ് സംസ്ഥാന സെക്രട്ടറി പി എം എ സലാം നേരത്തെ പ്രഖ്യാപിച്ചിരുന്നു. മുസ്ലിം സമുദായത്തിന് നീതി നഷ്ടപ്പെട്ടിരിക്കുന്നു. അതിന് ഉത്തരവദികളായ ഇടതുപക്ഷ സര്‍ക്കാരിന്റെ നടപടികള്‍ സമുദായത്തെ ബോധിപ്പിക്കും. ഇതിനായി വെള്ളിയാഴ്ചത്തെ ജുമഅ പ്രാര്‍ഥനയോടൊപ്പം ഇതിനെതിരെയുള്ള ബോധവത്കരണം നടത്തുമെന്നും പിഎംഎ സലാം വ്യക്തമാക്കിയിരുന്നു.
