ഹൃത്വികിന്റെ 44-ാം പിറന്നാളിന് അപ്രതീക്ഷിത സമ്മാനവുമായി അച്ഛന്‍ രാകേഷ് റോഷന്‍. ക്രിഷ് 4, 2020-ലെ ക്രിസ്മസിന് തിയറ്ററുകളിലെത്തുമെന്ന് രാകേഷ് റോഷന്‍ ഔദ്യോഗികമായി പ്രഖ്യാപിച്ചു. ട്വിറ്ററിലൂടെയാണ് രാകേഷ് റോഷന്‍ വിവരം അറിയിച്ചത്.
‘ഒരു പക്ഷെ ഇന്നാണ് ക്രിഷ് -4ന്റെ ഔദ്യോഗിക പ്രഖ്യാപനത്തിനുള്ള ഏറ്റവും നല്ല ദിനം. 2020-ക്രിസ്മസിന് ക്രിഷ്-4 തിയറ്ററുകളിലെത്തുമെന്നാണ് രാകേഷ് ട്വിറ്ററിലൂടെ അറിയിച്ചത്. അതേ സമയം, മകന് പിറന്നാള്‍ ആശംസ നേരാനും രാകേഷ് റോഷന്‍ മറന്നില്ല. രാകേഷ് റോഷന്‍ തന്നെയാണ് നാലാം പതിപ്പും സംവിധാനം ചെയ്യുന്നത്.
Today is perhaps the best day to make the release day of Krrish 4 official. Christmas 2020 it is. A gift for all of you on Hrithiks birthday. Happy birthday @iHrithik
— Rakesh Roshan (@RakeshRoshan_N) January 10, 2018
അതോടെ അമാനുഷിക കഥാപാത്രമായി ഹൃത്വിക് റോഷന്‍ വീണ്ടും വെള്ളിത്തിരയിലേയ്ക്ക് എത്തുകയാണ്. 2006-ല്‍ തുടങ്ങിയ പരമ്പരകളില്‍ മൂന്നെണ്ണത്തില്‍ ഹൃത്വിക് അഭിനയിച്ചിട്ടുണ്ട്. കോയി മില്‍ ഗയാ, ക്രിഷ്, ക്രിഷ് 3 എന്നീ ചിത്രങ്ങള്‍ക്ക് ശേഷം ക്രിഷ് ചലച്ചിത്ര ശ്രേണിയിലെ നാലാമത്തെ ചിത്രമാണിത്.
രോഹിത് മേഹ്‌റയുടെയും മകന് ക്രിഷിന്റെയും കഥയാണ് സിനിമയുടെ ഇതിവൃത്തം. കോയി മില്‍ ഗയാ, ക്രിഷ് എന്നീ ചിത്രങ്ങള്‍ വിജയം നേടിയെങ്കിലും ക്രിഷ് 3 പ്രതീക്ഷിച്ച പോലെ വിജയിച്ചില്ല. ചലചിത്രത്തെക്കുറിച്ച് ഹൃത്വിക് തന്റെ ട്വിറ്ററിലൂടെ നേരത്തെ പറഞ്ഞിരുന്നു. 2018 ക്രിസ്മസിനെത്തുമെന്നാണ് അന്ന് ഹൃത്വിക് പറഞ്ഞിരുന്നത്.
