കോട്ടയം: കന്യാസ്ത്രിയെ പീഡിപ്പിച്ച കേസില് ബിഷപ്പ് ഫ്രാങ്കോ മുളയ്ക്കല് ഇന്ന് കോടതിയില് ഹാജരാകും. വിചാരണയ്ക്ക് മുന്നോടിയായുള്ള പ്രാഥമിക നടപടികളായ അന്വേഷണ സംഘം സമര്പ്പിച്ച കുറ്റപത്രവും അനുബന്ധ രേഖകളും പരിശോധിക്കുന്നതിന് വേണ്ടിയാണ് ഫ്രാങ്കോ മുളയ്ക്കലിനെ കോടതി സമന്സ് നല്കി വിളിപ്പിക്കുന്നത്.
കോട്ടയം അഡീഷണല് ജില്ലാ കോടതിയാലാണ് കേസ് പരിഗണിക്കുന്നത്. കുറ്റവും വകുപ്പുകളും ഉള്പ്പെടെ വായിച്ചു കേള്പ്പിക്കാന് ബിഷപ്പ് ഫ്രാങ്കോ മുളയ്ക്കല് നേരിട്ട് കോടതിയില് ഹാജരാകേണ്ടതുണ്ട്. ഇതിനായി കോടതി കുറവിലങ്ങാട് പോലീസ് മുഖേന സമന്സ് കൈമാറിയിരുന്നു.
2018 സെപ്റ്റംബര് 21 നാണ് ജലന്ധര് രൂപതാ ബിഷപ്പായിരുന്ന ഫ്രാങ്കോ മുളയ്ക്കല് അറസ്റ്റിലാകുന്നത്. മാനഭംഗം, പ്രകൃതിവിരുദ്ധ പീഡനം, അധികാരം ദുരുപയോഗം ചെയ്ത് ലൈംഗിക പീഡനം തുടങ്ങി ജീവപര്യന്തം തടവുശിക്ഷ ലഭിക്കാവുന്ന 5 കുറ്റങ്ങളാണ് ഫ്രാങ്കോക്കെതിരെ ചുമത്തിയിട്ടുള്ളത്. ഇതില് 5 മുതല് 10 വര്ഷം വരെ കഠിന തടവ് ലഭിക്കാവുന്ന വകുപ്പുകളുമുണ്ട്.