കോഴിക്കോട്: കൂടത്തായി കൊലപാതകങ്ങളുമായി ബന്ധപ്പെട്ട് കൂടുതല് അറസ്റ്റിനു സാധ്യത. ദുരൂഹമരണങ്ങളില് കൂടുതല് പേര്ക്ക് പങ്കുണ്ടെന്ന് ജോളി മൊഴി നല്കിയതായാണ് സൂചന. റോയിയുടെ മരണമൊഴികെയുള്ള കേസുകളിലാണ് ജോളിക്ക് കൂടുതല് പേരില് നിന്ന് സഹായം ലഭിച്ചിരിക്കുന്നത്.
അതേസമയം കേസിലെ മൂന്ന് പ്രതികളെയും താമരശ്ശേരി ജുഡീഷ്യല് മജിസ്ട്രേറ്റ് കോടതി റിമാന്ഡ് ചെയ്തു. ഇവരെ കോഴിക്കോട് ജില്ലാ ജയിലിലേക്ക് മാറ്റി. കസ്റ്റഡിയില് വേണമെന്ന പൊലീസിന്റെ അപേക്ഷ കോടതി ബുധനാഴ്ച പരിഗണിക്കും.
മാത്യു സാമുവല്, പ്രജു കുമാര് എന്നിവരാണ് അറസ്റ്റിലായ മറ്റ് രണ്ട് പേര്. ജോളിക്ക് സയനൈഡ് എത്തിച്ചുകൊടുത്തവരാണ് മാത്യുവും പ്രജു കുമാര്. മൂന്ന് പേരെയും കസ്റ്റഡിയിലെടുത്ത് ചോദ്യം ചെയ്തതിന് ശേഷമാണ് അറസ്റ്റ് രേഖപ്പെടുത്തിയിരുന്നത്.
കൂടത്തായിയില് ഉദ്യോഗസ്ഥ ദമ്പതികള് ഉള്പ്പെടെ ആറ് പേരുടെ മരണത്തില് ദുരൂഹതയുണ്ടെന്ന സംശയത്തിന്റെ അടിസ്ഥാനത്തില് ഇവരുടെ മൃതദേഹങ്ങള് അടക്കം ചെയ്ത കോടഞ്ചേരി സെന്റ് മേരീസ് ഫറോന പള്ളിയിലെ കല്ലറകള് ഇന്നലെ തുറന്ന് പരിശോധിച്ചിരുന്നു. നിര്ണായക വിവരങ്ങളാണ് അന്വേഷണ സംഘത്തിന് ഇതിലൂടെ ലഭിച്ചത്. ഇതിന്റെ അടിസ്ഥാനത്തില് കൂടിയാണ് ജോളിയെ കസ്റ്റഡിയില് എടുത്ത് ചോദ്യം ചെയ്തത്.
ജോളിയുടെ ഭര്ത്താവ് റോയി, റോയിയുടെ പിതാവ് റിട്ട. വിദ്യാഭ്യാസ വകുപ്പ് ഉദ്യോഗസ്ഥന് ടോം തോമസ്, ഭാര്യ റിട്ട. അധ്യാപിക അന്നമ്മ, ടോം തോമസിന്റെ സഹോദര പുത്രന് ഷാജു സ്കറിയയുടെ ഭാര്യ സിലി, മകള് അല്ഫോണ്സ, അന്നമ്മയുടെ സഹോദരന് മാത്യു എന്നിവരാണ് പന്ത്രണ്ട് വര്ഷത്തിനിടെ കൊല്ലപ്പെട്ടത്.
ആദ്യം കൊല്ലപ്പെട്ടത് അന്നമ്മയായിരുന്നു. 2002 ആഗസ്റ്റ് 22 നായിരുന്നു അന്നമ്മയുടെ മരണം. തുടര്ന്ന് 2008 ആഗസ്റ്റ് 26 ന് ടോം തോമസ് മരണപ്പെട്ടു. 2011 സെപ്തംബര് 30 ന് റോയിയും 2014 ഫെബ്രുവരി 24 ന് മാത്യുവും കൊല്ലപ്പെട്ടു. രണ്ട് വയസ് മാത്രം പ്രായമുണ്ടായിരുന്ന അല്ഫോണ്സ 2014 മെയ് മൂന്നിനാണ് മരിച്ചത്. തുടര്ന്ന് 2016 ജനുവരി പതിനൊന്നിന് സിലിയും മരിച്ചു. റോയിയുടെ കുടുംബസ്വത്തിനെച്ചൊല്ലിയുള്ള തര്ക്കത്തെത്തുടര്ന്ന് ആസൂത്രിതമായി നടത്തിയ കൊലപാതകമാണെന്ന നിഗമനത്തിലാണ് പൊലീസ് എത്തിയിരിക്കുന്നത്.