തൃശ്ശൂര്: കൊടകര കുഴല്പ്പണ കേസില് ബിജെപി സംസ്ഥാന പ്രസിഡന്റ് കെ സുരേന്ദ്രന്റെ മകന് ഹരികൃഷ്ണനിലേക്കും അന്വേഷണം നീളുന്നു. കേസിലെ മുഖ്യപ്രതി ധര്മ്മരാജനും സുരേന്ദ്രന്റെ മകനും പല വട്ടം ഫോണില് ബന്ധപ്പെട്ടു എന്നാണ് അന്വേഷണ സംഘത്തിന് ലഭിച്ചിരിക്കുന്ന വിവരം. തെരഞ്ഞെടുപ്പ് കാലത്ത് ധര്മ്മരാജനും സുരേന്ദ്രന്റെ മകനും കോന്നിയില് വെച്ച് കൂടിക്കാഴ്ച നടത്തിയെന്നും വിവരം ലഭിച്ചിട്ടുണ്ട്. അന്വേഷണസംഘം സുരേന്ദ്രന്റെ മകന്റെയും മൊഴിയെടുക്കും.
അതേസമയം, ധര്മ്മരാജനെ അറിയാമെന്ന് ബിജെപി സംസ്ഥാന അധ്യക്ഷന് കെ.സുരേന്ദ്രന്റെ ഡ്രൈവറും സെക്രട്ടറിയും അന്വേഷണസംഘത്തിന് മൊഴി നല്കിയിട്ടുണ്ട്. ഇന്നലെ തൃശ്ശൂരില് വിളിച്ചു വരുത്തി പൊലീസ് ശേഖരിച്ച മൊഴിയിലാണ് ധര്മ്മരാജനെ തങ്ങള്ക്ക് പരിചയമുണ്ടെന്ന് കെ.സുരേന്ദ്രന്റെ ഡ്രൈവറും സെക്രട്ടറിയും പറഞ്ഞത്.
ധര്മരാജനെ അറിയാമെന്നും ചില പ്രചാരണ സാമഗ്രഹികള് ധര്മ്മജനെ ഏല്പിച്ചിരുന്നുവെന്നും പലവട്ടം ഇയാളെ ഫോണില് വിളിച്ചിരുന്നുവെന്നുമാണ് സെക്രട്ടറിയും ഡ്രൈവറും പൊലീസിന് നല്കിയിരിക്കുന്ന മൊഴി. കെ.സുരേന്ദ്രനും ധര്മ്മരാജനെ പരിചയമുണ്ടെന്നാണ് മൊഴിയില് പറയുന്നത്.