കൊച്ചി: നീണ്ട അനിശ്ചിതത്വത്തിനൊടുവിൽ വൈപ്പിൻ-ഫോർട്ട്കൊച്ചി റോ റോ സർവീസ് ഇന്നു പുനരാരംഭിക്കും. രാവിലെ ഒൻപതിന് ഫോർട്ട്കൊച്ചിയിൽ നിന്നാണ് ആദ്യ ട്രിപ്പ് . വൈകുന്നേരം ആറിന് ഫോർട്ട്കൊച്ചിയിൽ തന്നെ ട്രിപ്പ് അവസാനിക്കും. സര്‍വീസ് തുടങ്ങാന്‍ സ‍‍ജ്ജമാണെന്ന് കാണിച്ച് ഉള്‍നാടന്‍ ജലഗതാഗത വകുപ്പ് നഗരസഭയ്ക്ക് കഴിഞ്ഞ ദിവസം കത്ത് നല്‍കിയിരുന്നു.
നേരത്തേ, മുഖ്യമന്ത്രിയും കോര്‍പ്പറേഷന്‍ മേയറും എംപിയും എംഎല്‍എമാരും ഉള്‍പ്പെടെയുള്ളവര്‍ ആദ്യയാത്ര നടത്തിയാണ് റോ റോ സര്‍വീസ് ഉദ്ഘാടനം ചെയ്തത്. എന്നാൽ ലൈസന്‍സ് ലഭിക്കും മുന്‍പാണ് കൊച്ചി കോര്‍പ്പറേഷന്‍ സര്‍വീസ് ആരംഭിച്ചതെന്ന വിവരത്തെ തുടർന്ന് നിർത്തിവയ്ക്കുകയായിരുന്നു.
ആറു മണിക്ക് ശേഷം റോ റോ വെസലിന് പകരം ജങ്കർ ഓടിക്കാമെന്ന് അറിയിച്ചിരുന്നെങ്കിലും പ്രായോഗിക തടസമുള്ളതിനാൽ അതുണ്ടാകില്ലെന്ന് സർവീസ് നടത്തിപ്പ് കരാർ ഏറ്റെടുത്ത കേരള ഷിപ്പിംഗ് ആൻഡ് ഇൻലാൻഡ് നാവിഗേഷൻ കോർപറേഷൻ (കെഎസ്ഐഎൻസി) കോമേഴ്ഷ്യൽ മാനേജർ സിറിൽ ഏബ്രഹാം പറഞ്ഞു.
