കൊച്ചി: കൊച്ചി അന്താരാഷ്ട്ര വിമാനത്താവളത്തില്‍ അനധികൃതമായി കടത്താന്‍ ശ്രമിച്ച 5 കിലോ 350 ഗ്രാം സ്വര്‍ണ്ണം പിടികൂടി. ഡയറക്ടറേറ്റ് ഓഫ് റവന്യൂ ഇന്റലിജന്‍സ് നടത്തിയ മിന്നല്‍ പരിശോധനയിലാണ് രണ്ട് കോടി 31 ലക്ഷം രൂപ മൂല്യമുള്ള സ്വര്‍ണ്ണം പിടികൂടിയത്. ദമ്പതികള്‍ ഉള്‍പ്പെടെ മലപ്പുറം സ്വദേശികളായ നാല് പേര്‍ പിടിയിലായി.
ബാങ്‌കോക്ക്, ദുബായി, അബുദാബി എന്നിവിടങ്ങളില്‍ നിന്നെത്തിയവരാണ് പിടിയിലായത്. ദ്രവരൂപത്തില്‍ അടിവസ്ത്രത്തിലൊളിപ്പിച്ചും ആഭരണങ്ങളാക്കിയുമാണ് സ്വര്‍ണ്ണം കടത്താന്‍ ശ്രമിച്ചത്. ഇക്കഴിഞ്ഞ ഞായറാഴ്ച ദുബായിയില്‍ നിന്ന് എത്തിയ മലപ്പുറം സ്വദേശികളായ രണ്ട് യാത്രക്കാരില്‍ നിന്ന് ഒന്നേമുക്കാല്‍ കിലോ സ്വര്‍ണ്ണം പിടികൂടിയിരുന്നു. 74 ലക്ഷം രൂപ വില വരുന്ന സ്വര്‍ണ്ണം ബ്രെഡ് മേക്കറിന്റെ മോട്ടറിന്റെ ഉള്ളിലും ശരീരത്തിലും ഒളിപ്പിച്ചാണ് കൊണ്ടുവന്നത്.
