മക്ക: വിശുദ്ധ കഅബയെ പുതപ്പിക്കുന്ന കിസ്‌വ വസ്ത്രം നാട്ടിലേക്ക് കടത്താനുള്ള ശ്രമത്തിനിടയില്‍ രണ്ട് പാകിസ്താനികള്‍ സൗദിയില്‍ പിടിയിലായി. കിസ്‌വയുടെ ഏഴ് കഷ്ണങ്ങളാണ് ഇവരില്‍ നിന്ന് കണ്ടെടുത്തത്. അവ മക്കയിലെ സൗദി പോസ്റ്റ് ബ്രാഞ്ച് വഴി അയക്കാന്‍ ശ്രമിക്കവെ ആയിരുന്നു സൗദി സുരക്ഷാ ഉദ്യോഗസ്ഥരുടെ പിടിയിലായത്.
ഓരോ വര്‍ഷവും ഹജ്ജ് മാസമായ ദുല്‍ഹിജ്ജ ഒന്‍പതിന് കഅബയുടെ കിസ്‌വ വസ്ത്രം മാറ്റുക പതിവാണ്. വലിയ ആഘോഷത്തോടെയാണ് കിസ്‌വ പുടവ മാറ്റല്‍ ചടങ്ങ് സംഘടിപ്പിക്കാറ്. ഹജ്ജിനെത്തിയ വിശ്വാസികള്‍ അറഫ മൈതാനിയില്‍ സമ്മേളിക്കുന്ന ദിവസമാണ് ദുല്‍ഹിജ്ജ ഒന്‍പത്. അറഫയില്‍ നിന്ന് തിരികെയെത്തുന്ന വിശ്വാസികളെ സ്വീകരിക്കുന്നതിനു വേണ്ടിയാണ് ഇങ്ങനെ ചെയ്യാറ്. പ്രവാചകന്റെ കാലം മുതലേ നിലനില്‍ക്കുന്നതാണ് ഈ ചടങ്ങ്.
എന്നാല്‍ കിസ്‌വയുടെ കഷ്ണങ്ങള്‍ പാകിസ്താനികളുടെ കൈയില്‍ എങ്ങനെ എത്തിച്ചേര്‍ന്നുവെന്ന കാര്യം വ്യക്തമല്ല. മക്കയിലെ ഇന്ത്യക്കാരനായ കച്ചവടക്കാരനില്‍ നിന്ന് 300 റിയാലിനാണ് തങ്ങള്‍ ഇത് വാങ്ങിയതെന്ന് പാകിസ്താനികള്‍ പറഞ്ഞതായി പൊലീസ് അറിയിച്ചു. എന്നാല്‍ നിജസ്ഥിതി അറിയാന്‍ കൂടുതല്‍ അന്വേഷണം നടത്തുകയാണ് പൊലീസ്.
