ന്യൂയോർക്ക്: അമേരിക്കൻ ആഭ്യന്തര സുരക്ഷാ സെക്രട്ടറി കിർസ്റ്റ്‍ജെൻ നീൽസെൻ രാജി വച്ചു. കുടിയേറ്റ വിഷയത്തെക്കുറിച്ചും മെക്സിക്കോ അതിർത്തിയിൽ മതിൽ പണിയുന്നതിനെക്കുറിച്ചുമുള്ള അഭിപ്രായ വ്യത്യാസങ്ങളാണ് രാജിക്ക് പിന്നിലെന്നാണ് സൂചന. പ്രസിഡന്‍റ് ഡോണള്‍ഡ് ട്രംപിന്റെ അതിര്‍ത്തി നയങ്ങളുടെ മുഖവും നടത്തിപ്പുകാരിയുമായിരുന്നു നീല്‍സണ്‍.
അനധികൃത കുടിയേറ്റം അവസാനിപ്പിച്ചില്ലങ്കിൽ മെക‌്സിക്കൻ അതിർത്തി പൂർണമായും അടക്കുമെന്ന് ട്രംപ് കഴിഞ്ഞ ദിവസം ട്വീറ്റ് ചെയ്തിരുന്നു.
കിര്‍സ്റ്റ്‍ജെന്‍ നീല്‍സെനുമായുള്ള കൂടിക്കാഴ്ചയ്ക്ക് ശേഷം ട്വിറ്ററിലൂടെ ട്രംപ് തന്നെയാണ് രാജിക്കാര്യം അറിയിച്ചത്. കസ്റ്റംസ് ആന്‍റ് ബോര്‍ഡര്‍ പ്രൊട്ടക്ഷന്‍ കമ്മീഷണറായ കെവിന്‍ മഗ്‌അലീനന് താല്‍ക്കാലിക ചുമതല നല്‍കിയതായും ട്രംപ് വ്യക്തമാക്കി. നീല്‍സെന്‍റെ സേവനത്തിന് നന്ദി അറിയിക്കുന്നതായും ട്രംപ് ട്വീറ്റ് ചെയ്തു.
