കൊച്ചി: കൊച്ചി തമ്മനം ഇലവുങ്കലില്‍ നിന്ന് നാലു വയസുകാരനെ തട്ടിയെടുക്കാന്‍ ശ്രമിക്കുന്നതിനിടെ ഇതര സംസ്ഥാനക്കാരന്‍ പിടിയില്‍. മുത്തച്ഛനൊപ്പം പോയ കുട്ടിയെയാണ് തട്ടിക്കൊണ്ടു പോകാന്‍ ശ്രമം നടത്തിയത്. അസം സ്വദേശിയായ മുഹമ്മദ് ഇബ്‌നുള്‍ റഹ്മാനെയാണ് നാട്ടുകാര്‍ പിടികൂടി പൊലീസിന് കൈമാറി. ശനിയാഴ്ച രാവിലെയായിരുന്നു കുട്ടിയെ തട്ടിയെടുക്കാന്‍ ശ്രമമുണ്ടായത്.
കൊച്ചു മകനുമായി മുടിവെട്ട് കടയില്‍ നിന്നു മടങ്ങുകയായിരുന്നു മുത്തച്ഛന്‍. കുട്ടിയുടെ കൈയ്യില്‍ പിടിച്ചാണ് വീട്ടിലേക്കു വന്നത്. ഇതിനിടെ പിന്നാലെ ഓടിയെത്തിയ യുവാവ് കുട്ടിയെ വാരിയെടുക്കാന്‍ ശ്രമിക്കുകയായിരുന്നു. തടയാന്‍ ശ്രമിച്ച മുത്തച്ഛനെ തള്ളിയിടുകയും ചെയ്തു. സംഭവം കണ്ട പരിസരവാസികള്‍ ഓടിയെത്തി മുഹമ്മദ് ഇബ്‌നുളിനെ തടഞ്ഞുനിര്‍ത്തുകയായിരുന്നു.
പാലാരിവട്ടം പോലീസ് എത്തി യുവാവിനെ എറണാകുളം ജനറല്‍ ആശുപത്രിയില്‍ വൈദ്യ പരിശോധനയ്ക്കു വിധേയനാക്കി. മാനസികാസ്വാസ്ഥ്യമുള്ളതായി കണ്ടെത്തിയതിനെ തുടര്‍ന്ന് ഇയാളെ തൃശ്ശൂര്‍ മാനസികാരോഗ്യ കേന്ദ്രത്തിലേക്കു മാറ്റാന്‍ നിര്‍ദേശിച്ചു. കോടതിയില്‍ ഹാജരാക്കിയ ശേഷമാണ് തൃശ്ശൂരിലേക്കു കൊണ്ടുപോയത്.
തമ്മനം പള്ളിക്കു മുന്നില്‍ ഇയാള്‍ അലഞ്ഞുതിരിഞ്ഞു നടക്കുന്ന നിലയില്‍ കണ്ടതിനെ തുടര്‍ന്ന് ദിവസങ്ങള്‍ മുമ്പ് പോലീസ് സ്റ്റേഷനില്‍ കൊണ്ടുവന്ന് വിവരങ്ങള്‍ ശേഖരിച്ചു വിട്ടയച്ചിരുന്നതായി പോലീസ് അറിയിച്ചു.
