കേരളാ തീരത്ത് മത്തിയുടെ ലഭ്യത കുറയുന്നു; കാരണം എല്‍നീനോ പ്രതിഭാസം

കൊച്ചി: സംസ്ഥാനത്ത് മത്തിയുടെ ലഭ്യത കുറയുന്നു. എല്‍നീനോ എന്ന പ്രതിഭാസം മൂലമാണ് കേരളത്തിന്റെ കടല്‍ തീരങ്ങളില്‍ മത്തിയുടെ ലഭ്യത കുറയുന്നതും മീനുകള്‍ തമിഴ്നാട് തീരത്തേക്ക് പോവുന്നതുമെന്നാണ് റിപ്പോര്‍ട്ട്. കഴിഞ്ഞ അഞ്ച് വര്‍ഷത്തിനിടെ കേരളത്തില്‍ ഏറ്റവും കൂടുതല്‍ മത്തി ലഭ്യത കുറഞ്ഞത് ഇത്തവണയാണ്.

സമുദ്രജലത്തിന്റെ ചൂട് കൂടുന്ന പ്രതിഭാസമാണ് എല്‍നിനോ. ഇതാണ് മത്തിയുടെ വളര്‍ച്ചയെയും പ്രത്യുല്‍പാദനത്തേയും ബാധിച്ചിരിക്കുന്നത്. ചൂട് കൂടുന്നതോടെ മീന്‍ കേരളാ തീരത്ത് നിന്നും തമിഴ്നാട്ടിലെ രാമേശ്വരം ഭാഗത്തേക്ക് നീങ്ങും. അറബിക്കടലില്‍ 50,000 മുതല്‍ ഒരു ലക്ഷം വരെ മുട്ടകളുടെ പ്രത്യുല്‍പാദനം നടക്കേണ്ട സ്ഥാനത്ത് ഇപ്പോള്‍ അയ്യായിരത്തില്‍ താഴെ മുട്ടകളേ ഉത്പാദിപ്പിക്കപ്പെട്ടുള്ളൂ എന്നാണ് കേന്ദ്ര മത്സ്യ ഗവേഷണകേന്ദ്രം പറയുന്നത്.

കേരളത്തിലെ കടലിനടിയില്‍ ചൂട് വര്‍ധിച്ചതിനാല്‍ മത്തികള്‍ കൂട്ടത്തോടെ താപനില കുറഞ്ഞ തെക്കന്‍ ഭാഗത്തേക്ക് നീങ്ങുകയാണ് ചെയ്യുന്നത്. ബാക്കിയുള്ളവയെ മറ്റ് വലിയ മത്സ്യങ്ങള്‍ ഭക്ഷിക്കുകയോ അല്ലെങ്കില്‍ മീന്‍പിടുത്തക്കാര്‍ പിടികൂടുന്ന അവസ്ഥയാണ് ഉള്ളതെന്നുമാണ് അധികൃതര്‍ പറയുന്നത്.

Top