കോട്ടയം: അവസരവാദ രാഷ്ട്രീയ പ്രവര്‍ത്തനം നടത്തുന്ന പാര്‍ട്ടിയാണ് കേരളാ കോണ്‍ഗ്രസെന്ന് പരിഹസിച്ച്‌ വെള്ളാപ്പള്ളി നടേശൻ. മാറിയും മറിഞ്ഞും ശീലമുള്ളവരാണ് കേരളാ കോണ്‍ഗ്രസുകാരെന്നും വെള്ളാപ്പള്ളി പറഞ്ഞു.
കേരളാ കോണ്‍ഗ്രസിലെ സംഭവങ്ങള്‍ പുതിയ പ്രതിഭാസമല്ലെന്നും നല്ല ഓഫര്‍ കിട്ടിയാല്‍ മാണിയും മകനും എന്‍ഡിഎയിലേക്ക് പോയിക്കൂടെന്നില്ലെന്നും അത് ആദര്‍ശ ശുദ്ധിയുള്ള പാര്‍ട്ടി അല്ലെന്നും അവസരവാദ രാഷ്ട്രീയ പാര്‍ട്ടിയാണെന്നും വെള്ളാപ്പള്ളി വ്യക്തമാക്കി.
കേരള കോണ്‍ഗ്രസ് നേതാക്കള്‍ അറിയാതെയാണ് കോട്ടയത്ത് സഖ്യമുണ്ടായതെങ്കിൽ നേതൃത്വം എന്തുകൊണ്ട് നടപടി കൈക്കൊള്ളുന്നില്ലെന്നും വെള്ളാപ്പള്ളി ചോദിച്ചു. കേരള കോണ്‍ഗ്രസില്‍ ഉടന്‍ പിളര്‍പ്പുണ്ടാകില്ലെന്നും അദ്ദേഹം അഭിപ്രായപ്പെട്ടു.
പിണറായി വിജയന്‍ ഉപദേശികളില്ലായിരുന്നെങ്കില്‍ നല്ല ഭരണാധികാരിയാകുമായിരുന്നു. ഉപദേശികളെ പറഞ്ഞുവിട്ടാല്‍ ഭരണം കൂടുതല്‍ നന്നാവും. കൈയേറ്റം ഒഴിപ്പിക്കുന്നതില്‍ അഭിനന്ദനാര്‍ഹമായ നടപടിയാണ് സ്വീകരിച്ചിരിക്കുന്നത്. കുരിശുവച്ചാലും ശൂലംവച്ചാലും കൈയേറ്റമാണെങ്കിൽ ഒഴിപ്പിക്കുക തന്നെ വേണമെന്നും അദ്ദേഹം പറഞ്ഞു.
