ചെന്നൈ: മലയാളി താരം കരുണ്‍ നായര്‍ക്ക് ട്രിപ്പിള്‍ സെഞ്ചുറി. ഇന്ത്യ ടെസ്റ്റ് ക്രിക്കറ്റ് ചരിത്രത്തിലെ ഏറ്റവും ഉയര്‍ന്ന സ്‌കോറില്‍. ഇംഗ്ലണ്ടിനെതിരായ അഞ്ചാം ടെസ്റ്റില്‍ നാലാം ദിനം കളി അവസാനിക്കുമ്പോള്‍ ക്രിക്കറ്റില്‍ വന്‍ നേട്ടങ്ങള്‍ സ്വന്തമാക്കുകയാണ് ഇന്ത്യ.
303 റണ്‍സോടെ പുറത്താകാതെ നിന്ന കരുണിന്റെ മികവില്‍ ഇന്ത്യ 759/7 എന്ന നിലയില്‍ ഡിക്ലയര്‍ ചെയ്തു. 282 റണ്‍സിന്റെ ഒന്നാം ഇന്നിംഗ്‌സ് ലീഡാണ് ഇന്ത്യയ്ക്ക് ലഭിച്ചത്.
വീരേന്ദര്‍ സേവാഗിന് ശേഷം ടെസ്റ്റില്‍ ട്രിപ്പിള്‍ സെഞ്ചുറി നേടുന്ന ആദ്യതാരമാണ് പാതി മലയാളി കൂടിയായ കരുണ്‍. രണ്ടു ട്രിപ്പിള്‍ സെഞ്ചുറികള്‍ നേടിയ സേവാഗ് മാത്രമാണ് ടെസ്റ്റ് ക്രിക്കറ്റ് ചരിത്രത്തില്‍ ഈ നേട്ടം കൈവരിച്ച ഇന്ത്യക്കാരന്‍.
കരിയറിലെ മൂന്നാം മത്സരം മാത്രം കളിക്കുന്ന ഈ കര്‍ണാടകക്കാരന്‍ 32 ഫോറും നാല് സിക്‌സറുകളും പറത്തിയാണ് സ്വപ്ന തുല്യമായ നേട്ടം കൈവരിച്ചത്.
കന്നി സെഞ്ചുറി തന്നെ ട്രിപ്പിള്‍ സെഞ്ചുറിയാക്കി മാറ്റാനും ഈ യുവതാരത്തിന് കഴിഞ്ഞു. ട്രിപ്പിള്‍ സെഞ്ചുറി നേടുന്ന പ്രായം കുറഞ്ഞ ബാറ്റ്‌സ്മാന്‍മാരില്‍ ആറാമനാണ് കരുണ്‍.
