ബെംഗളൂരു: ഹിജാബ് മതാചാരത്തിന്റെ ഭാഗമല്ലെന്ന് കര്ണാടക സര്ക്കാര് ഹൈക്കോടതിയില്. ഭരണഘടന ഉറപ്പ് നല്കുന്ന മതസ്വാതന്ത്രത്തിനുള്ള അവകാശത്തില് ഹിജാബ് വരില്ലെന്ന് സര്ക്കാര് ചൂണ്ടിക്കാട്ടി. ഇസ്ലാം മതത്തിലെ ഒഴിവാക്കാനാകാത്ത ആചാരമല്ല ഹിജാബ് എന്നും ഹിജാബ് നിര്ബന്ധമാക്കാന് ഭരണഘടനാ ധാര്മ്മികതയില്ലെന്നും കര്ണാടക സര്ക്കാര് കോടതിയില് പറഞ്ഞു.
കോളേജുകളിലും സ്കൂളുകളിലും ഹിജാബ് വിലക്കിയതിനെതിരെ നല്കിയ ഹര്ജി പരിഗണിക്കുന്ന ഹൈക്കോടതി ഭരണഘടനാ ബെഞ്ചിന് മുന്നിലാണ് സര്ക്കാരിന് വേണ്ടി അഡ്വക്കേറ്റ് ജനറല് പ്രഭുലിംഗ് നവദ്ഗി ഇക്കാര്യം അറിയിച്ചത്.ഹിജാബ് വിലക്കിയതുമായി ബന്ധപ്പെട്ടുള്ള സംസ്ഥാന സര്ക്കാരിന്റെ ഉത്തരവ് നിയമാനുസൃതമാണെന്നും അതിനെ എതിര്ക്കേണ്ട കാര്യമില്ലെന്നും എജി കോടതിയില് പറഞ്ഞു.
അതേസമയം, മതപരമായ വസ്ത്രങ്ങള് വിലക്കിക്കൊണ്ടുള്ള ഹൈക്കോടതിയുടെ ഇടക്കാല ഉത്തരവ് മുസ്ലിം വിദ്യാര്ത്ഥികള്ക്ക് ഏറെ ബുദ്ധിമുട്ട് സൃഷ്ടിക്കുന്നതാണെന്ന് ഹര്ജിക്കാര്ക്കുവേണ്ടി ഹാജരായ അഭിഭാഷന് ചൂണ്ടിക്കാട്ടി. എന്നാല് ഉത്തരവ് വ്യക്തമാണെന്നും ഇക്കാര്യത്തില് രേഖാമൂലം അപേക്ഷ തന്നാല് മാത്രമേ തങ്ങള്ക്ക് ഇടപെടാനാകൂവെന്നും ചീഫ് ജസ്റ്റിസ് വ്യക്തമാക്കി.
കേസില് ഇന്ന് ആറാംദിവസമാണ് ഹൈക്കോടതിയില് വാദം തുടരുന്നത്. തിങ്കളാഴ്ചയും വാദം തുടരും. ഹിജാബ് നിരോധനം റദ്ദാക്കണമെന്ന് ആവശ്യപ്പെട്ട് കര്ണാടകയിലെ കോളേജ് വിദ്യാര്ത്ഥിനികളാണ് ഹര്ജി നല്കിയിരിക്കുന്നത്.