കോഴിക്കോട്: കൊടുവള്ളിയില് ഇടത് സ്വതന്ത്രനായി വീണ്ടും മത്സരിക്കുമെന്ന് കാരാട്ട് റസാഖ്. കഴിഞ്ഞ തിരഞ്ഞെടുപ്പില് യു.ഡി.എഫിനെ ഞെട്ടിച്ച് നിയമസഭയിലെത്തിയ എം.എല്.എ.യാണ് കാരാട്ട് റസാഖ്. ലീഗിന്റെ കോട്ട അട്ടിമറിച്ചാണ് 2016-ല് ഇടത് സ്വതന്ത്രനായി മത്സരിച്ച് കാരാട്ട് റസാഖ് ജയിച്ചുകയറിയത്. ഇത്തവണ എതിരാളി ആരായാലും പ്രശ്നമില്ലെന്നും നല്ല ആത്മവിശ്വാസത്തിലാണെന്നും കാരാട്ട് റസാഖ് പറഞ്ഞു.
ഈ തിരഞ്ഞെടുപ്പില് മത്സരിക്കണമെന്ന് ഇടതുപക്ഷത്തിന്റെ ബന്ധപ്പെട്ട ആളുകള് ആവശ്യപ്പെട്ടിട്ടുണ്ട്. ആ നിലയ്ക്ക് ഇത്തവണയും മത്സരിക്കുകയാണെങ്കില് ഒരുപാട് പിന്തുണയും തേടേണ്ടതുണ്ട്. അതിനുവേണ്ടിയുളള ആശയവിനിമയം നടത്തിവരികയാണ്. പിന്തുണ വീണ്ടും ലഭിക്കുകയാണെങ്കില് വീണ്ടും മത്സരിക്കണമെന്നാണ് ആഗ്രഹം.-അദ്ദേഹം പറഞ്ഞു.
‘കഴിഞ്ഞ തിരഞ്ഞെടുപ്പില് മത്സരിക്കുമ്പോള് ചൂണ്ടിക്കാണിക്കാന് നേട്ടങ്ങളോ വികസനപ്രവര്ത്തനങ്ങളോ ഉണ്ടായിരുന്നില്ല. എന്നാല് ഇത്തവണ കൊടുവളളി നിയോജകമണ്ഡലത്തിന്റെ വിവിധ ഭാഗങ്ങളില് നടപ്പാക്കിയിട്ടുളള വികസനങ്ങള് ചൂണ്ടിക്കാണിക്കാനുണ്ട്. അതുകൊണ്ട് തന്നെ മുസ്ലീംലീഗിന്റെ പഴയ സ്ഥാനാര്ഥികള് വന്നാല് ഭയപ്പടേണ്ട സാഹചര്യം നിലവില് ഇല്ല.’ റസാഖ് പറയുന്നു.