മുംബൈ: ആഡംബര കപ്പലിലെ ലഹരി വിരുന്നില്‍ ബോളിവുഡ് താരം ഷാരൂഖ് ഖാന്റെ മകന്‍ ആര്യന്‍ ഖാന്‍ അറസ്റ്റിലായതില്‍ പ്രതികരണവുമായി നടി കങ്കണ റണാവത്ത് രംഗത്തി. ആര്യന്‍ ഖാനെ അറസ്റ്റ് ചെയ്തതില്‍ വന്‍ താരനിര തന്നെ പ്രതിഷേധവുമായി രംഗത്ത് വന്നിട്ടുണ്ട്. ഇതിനെതിരെയാണ് പരസ്യമായി കങ്കണ രംഗത്തെത്തിയിരിക്കുന്നത്.
2014ല്‍ തന്റെ മകന്‍ ലഹരിമരുന്ന് കേസില്‍ അറസ്റ്റിലായപ്പോള്‍ ജാക്കി ചാന്‍ എങ്ങനെ പ്രതികരിച്ചു എന്ന് അവര്‍ ഓര്‍മ്മിപ്പിക്കുന്നു. മകന്റെ പ്രവൃത്തിയില്‍ പരസ്യമായി മാപ്പ് പറഞ്ഞാണ് നടന്‍ അന്ന് പ്രതികരിച്ചത്. മകന്റെ പ്രവൃത്തിയില്‍ ഞാന്‍ ലജ്ജിക്കുന്നു. ഇത് എന്റെ പരാജയമാണ്, അവനെ സംരക്ഷിക്കാനായി ഞാന്‍ ഇടപെടില്ലെന്നാണ് സംഭവത്തില്‍ അദ്ദേഹം പ്രതികരിച്ചത്. മകന്റെ അറസ്റ്റില്‍ കിങ് ഖാന്‍ തുടര്‍ന്നു പോരുന്ന നിശബ്ദതയ്‌ക്കെതിരെ കൂടിയാണ് കങ്കണയുടെ പോസ്റ്റ്.
ഒക്ടോബര്‍ 2 ന് ഗോവയിലേക്കുള്ള ആഡംബര കപ്പലില്‍ എന്‍സിബി നടത്തിയ റെയ്ഡിലാണ് ആര്യന്‍ ഖാന്‍ അറസ്റ്റിലായത്. ചോദ്യം ചെയ്യലില്‍ ദീര്‍ഘകാലമായി താന്‍ മയക്കുമരുന്ന് ഉപയോഗിക്കുന്നതായി താരപുത്രന്‍ സമ്മതിച്ചിട്ടുമുണ്ട്.
