തിരുവനന്തപുരം: കെ എം മാണിയെ എൽഡിഎഫിലെടുക്കാൻ ഒരിക്കലും ആലോചന നടന്നിട്ടില്ലെന്ന് സിപിഐ സംസ്ഥാന സെക്രട്ടറി കാനം രാജേന്ദ്രൻ.
കേരള കോണ്ഗ്രസിനെയും മാണിയെയും എൽഡിഎഫിലെടുക്കാനോ മുഖ്യമന്ത്രിയാക്കാനോ ആലോചന നടന്നിട്ടില്ല. മാണിയെ മുഖ്യമന്ത്രിയാക്കാന് എല്ഡിഎഫ് തയാറായിരുന്നെന്ന മന്ത്രി ജി. സുധാകരന്റെ പ്രസ്താവനയോട് പ്രതികരിക്കുകയായിരുന്നു അദ്ദേഹം
ജി. സുധാകരൻ പറഞ്ഞത് സിപിഎമ്മിൽ നടന്ന ആലോചനയായിരിക്കുമെന്നും അദ്ദേഹം പറഞ്ഞു. കാര്യങ്ങൾ പറയുമ്പോൾ സത്യസന്ധത പുലർത്തണമെന്നും കാനം വ്യക്തമാക്കി.
അതിനിടെ, മാണിയെ മുഖ്യമന്ത്രിയാക്കാൻ എൽഡിഎഫ് തീരുമാനിച്ചിരുന്നെന്ന് താൻ പറഞ്ഞിട്ടില്ലെന്ന് മന്ത്രി ജി. സുധാകരൻ പറഞ്ഞു. ഇത് ചിലർ ഉണ്ടാക്കിയ കെട്ടുകഥയാണ്. 2012-ല് മാണി രാഷ്ട്രീയമായി നേര്വഴിക്ക് സഞ്ചരിച്ചിരുന്നെങ്കില് അദ്ദേഹത്തിന് രാഷ്ട്രീയത്തില് ഉന്നതി കിട്ടുമായിരുന്നെന്ന് നിയമസഭയില് പ്രസംഗിച്ച കാര്യമാണ് പറഞ്ഞതെന്നും അദ്ദേഹം വ്യക്തമാക്കി.