കൊച്ചി: പ്രധാനമന്ത്രി നരേന്ദ്ര മോദിയെ പ്രകീര്ത്തിച്ച സംഭവത്തില് വിശദീകരണവുമായി കെ വി തോമസ്. താന് ഇംഗ്ലീഷില് നടത്തിയ പ്രസംഗം ചില മാധ്യമങ്ങള് തെറ്റായി റിപ്പോര്ട്ട് ചെയ്തതെന്ന് കെ.വി തോമസ് പറഞ്ഞു. മോദിയെ അനുകൂലിച്ചില്ലെന്നാണ് കെ.വി തോമസ് തന്നോട് പറഞ്ഞതെന്ന് പ്രതിപക്ഷ നേതാവ് രമേശ് ചെന്നിത്തലയും വ്യക്തമാക്കി.
‘നോട്ട് നിരോധനം, ജിഎസ്ടി നടപ്പാക്കല് തുടങ്ങിയവയിലൊക്കെ താന് എടുത്ത നിലപാടിനെ മറ്റുള്ളവരെ ബോധ്യപ്പെടുത്താന് അദ്ദേഹത്തിനു സാധിച്ചു. അതിലെ ശരിതെറ്റുകളോ രാഷ്ട്രീയമോ അല്ല പറയുന്നത്. ഭരണനിര്വഹണം എന്നതു ശാസ്ത്രീയമായ ടെക്നിക്കാണ്. അക്കാര്യത്തില് മോദി വിദഗ്ധനാണ്. പിഎസി ചെയര്മാനായിരിക്കെ നോട്ട് നിരോധന കാര്യത്തില് പ്രധാനമന്ത്രിയുടെ വിശദീകരണം തേടി. ഡിസംബര് 31നു മുമ്പ് എല്ലാം ശരിയാകുമെന്ന് അദ്ദേഹം ഉറപ്പുനല്കി. അതുപോലെതന്നെ സംഭവിച്ചു. രാജ്യത്തു യാതൊരു കലാപവുമുണ്ടായില്ല.
ജനങ്ങളെ വിശ്വസിപ്പിക്കാന് മോദിക്കു കഴിയുന്നുണ്ട്. സ്വന്തം പാര്ട്ടിയായ കോണ്ഗ്രസിന്റെ നേതാക്കളേക്കാള് ഞാന് കൂടുതല് കംഫര്ട്ടബിളാകുന്നത് മോദിയുമായി ആശയവിനിമയം നടത്തുമ്പോഴാണ്. കോണ്ഗ്രസ് ബോഫോഴ്സ് മുതലിങ്ങോട്ട് ഒട്ടേറെ പ്രശ്നങ്ങളെ നേരിട്ടു. എന്നാല് എല്ലാ പ്രശ്നങ്ങളെയും മോദി തന്റെ സവിശേഷമായ മാനേജ്മെന്റ് ടെക്നിക് ഉപയോഗിച്ചു കൈകാര്യം ചെയ്യുന്നു. മീഡിയ, ജുഡീഷ്യറി എന്നിവയിലെല്ലാം നാലുകൊല്ലമായി മോദിയുടെ ഈ മാനേജ്മെന്റ് വൈദഗ്ധ്യം കാണാം. രാഷ്ട്രീയമായും ആശയപരമായും മോദിയെ മിക്ക കാര്യങ്ങളിലും എതിര്ക്കുന്നുണ്ടെങ്കിലും അദ്ദേഹത്തിന്റെ ഈ സവിശേഷത കാണാതിരിക്കാനാവില്ല.’ കെവി തോമസ് പറഞ്ഞു.
കത്തുവ, ഉന്നാവോ ബലാത്സംഗ കേസുകളില് പ്രധാനമന്ത്രി ഇടപെടുന്നില്ലെന്ന് ആരോപിച്ച് രാജ്യത്ത് കടുത്ത പ്രതിഷേധമാണ് നടക്കുന്നത്. ഇതിനിടെ മോദി സര്ക്കാരിനെ പുകഴ്ത്തി കെവി തോമസ് രംഗത്തെത്തിയത് വിമര്ശനങ്ങള്ക്ക് വഴിവെച്ചിരുന്നു.