തിരുവനന്തപുരം: പൗരത്വ നിയമ ഭേദഗതിക്കെതിരെ ഇടതു മുന്നണി നടത്തിയ മനുഷ്യ ശൃംഖലയെ വിമര്ശിച്ച് ബിജെപി നേതാവ് കെ സുരേന്ദ്രന്. എപ്പോഴും ഇത്തരം കോപ്രായം ആവര്ത്തിക്കുന്നത് കാഴ്ചക്കാരില് അരോചകത്വമാണ് ഉണ്ടാക്കുന്നതെന്ന് നടത്തിപ്പുകാര് തിരിച്ചറിയണമെന്നും ആവര്ത്തന വിരസതയുണ്ടാക്കുന്നുവെന്നും സുരേന്ദ്രന് ഫേസ്ബുക്കിലൂടെ വിമര്ശിച്ചു.
ഈ വൃത്തികെട്ട ഏര്പ്പാട് തുടങ്ങിയിട്ട് മൂന്നു പതിറ്റാണ്ടു കഴിഞ്ഞില്ലേയെന്നും, എന്താണ് ഈ ചവിട്ടുനാടകം കൊണ്ട് നേടിയതെന്നും സുരേന്ദ്രന് പരിഹസിച്ചു.
കെ സുരേന്ദ്രന്റെ പോസ്റ്റ്
ആവര്ത്തനവിരസത എന്നൊന്നുണ്ട്. എപ്പോഴും ഈ കോപ്രായം ആവര്ത്തിക്കുന്നത് കാഴ്ചക്കാരില് അരോചകത്വമാണ് ഉണ്ടാക്കുന്നതെന്ന് നടത്തിപ്പുകാര്ക്ക് തിരിച്ചറിയാന് കഴിയുന്നില്ലെങ്കില് അതവരുടെ കുഴപ്പമായി മാത്രമേ കാണാനാവൂ. നിങ്ങളീ വൃത്തികെട്ട ഏര്പ്പാട് തുടങ്ങിയിട്ട് മൂന്നു പതിറ്റാണ്ടു കഴിഞ്ഞില്ലേ? എന്താണ് നിങ്ങളീ ചവിട്ടുനാടകം കൊണ്ട് നേടിയത്? ഈ ഇന്ത്യാ മഹാരാജ്യത്ത് ഒന്നരശതമാനം ജനങ്ങളുടെ പിന്തുണപോലും നിങ്ങള്ക്കില്ലെന്നത് നിങ്ങള് തിരിച്ചറിയുന്നില്ലേ? എട്ടും പൊട്ടും തിരിയാത്ത പ്രൈമറി സ്ക്കൂള് കുട്ടികളേയും പാവപ്പെട്ട തൊഴിലുറപ്പു തൊഴിലാളികളേയും ബലം പ്രയോഗിച്ച് അണിനിരത്തി ചങ്ങലപിടിക്കുന്ന ഈ പ്രഹസനം ആരെ ആകര്ഷിക്കാനാണ് സഖാക്കളേ? ന്യൂനപക്ഷങ്ങളെ ഉദ്ദേശിച്ചാണെങ്കില് അവര് നിങ്ങളെ വിശ്വസിക്കുമോ? ഈ രാജ്യത്തെ ന്യൂനപക്ഷങ്ങളില് എത്ര ശതമാനം പേരുടെ പിന്തുണ നിങ്ങള്ക്കുണ്ട്? മമതയ്ക്കും മുലായമിനും ലാലുവിനും എന്തിന് ഒവൈസിക്കുപോലും പിന്നിലാണ് നിങ്ങളെ ന്യൂനപക്ഷങ്ങള് കാണുന്നത്. ബംഗാളില് ഒരുശതമാനം പോലും മുസ്ളീം പിന്തുണ നിങ്ങള്ക്കില്ലെന്നാണ് കണക്കുകള് സൂചിപ്പിക്കുന്നത്. ഉള്ള ഹിന്ദുക്കളുടെ പിന്തുണ കൂടി പോയിക്കിട്ടുമെന്നല്ലാതെ ഈ ചങ്ങലകൊണ്ട് പുതുതായി ഒന്നും ഇവിടെ സംഭവിക്കാനില്ല. അലനും താഹയും വെറുതെ ഉണ്ടാവുന്നതല്ലെന്ന് താമസം വിനാ നിങ്ങള്ക്കംഗീകരിക്കേണ്ടിവരികതന്നെ ചെയ്യും. അറബിക്കഥയിലെ ക്യൂബാ മുകുന്ദനെപ്പോലെ ബാത്ത്റൂമില്ക്കയറി ഇന്ക്വിലാബ് വിളിക്കേണ്ട ഗതികേടാണ് ചങ്ങലപ്പാര്ട്ടിയെ കാത്തിരിക്കുന്നത്.
അതേസമയം എല് ഡി എഫ് നടത്തിയ മനുഷ്യ മഹാശൃംഖലയില് വന് ജനപങ്കാളിത്തമായിരുന്നു ദൃശ്യമായത്. പൗരത്വ നിയമ ഭേദഗതി പിന്വലിക്കുക, ഭരണഘടന സംരക്ഷിക്കുക എന്നീ മുദ്രാവാക്യങ്ങള് ഉയര്ത്തിയാണ് മനുഷ്യ മഹാശൃംഖല തീര്ത്തത്. സിപിഎം പിബി അംഗം എസ് രാമചന്ദ്രന്പിള്ള കാസര്കോട് ആദ്യ കണ്ണിയും സിപിഎം പിബി അംഗം എം എ ബേബി അവസാനകണ്ണിയുമായാണ് കേരളത്തില് ശൃംഖല തീര്ത്തത്.