തൃശൂര്: ടി.എന്. പ്രതാപന് എം.പിക്ക് നിരോധിത പോപ്പുലര് ഫ്രണ്ടുമായി ബന്ധമെന്ന ആരോപണം ആവര്ത്തിച്ച് ബി.ജെ.പി സംസ്ഥാന പ്രസിഡന്റ് കെ. സുരേന്ദ്രന്. താന് നേരത്തെ ഇത് പറഞ്ഞപ്പോള് എന്തൊക്കെയോ ചെയ്യുമെന്ന് പ്രതാപന് പറഞ്ഞു. ഒന്നുമുണ്ടായില്ല. വീണ്ടും പറയുകയാണെന്നും സുരേന്ദ്രന് തൃശൂരില് വാര്ത്തസമ്മേളനത്തില് പറഞ്ഞു.
തൃശൂരിന്റെ തീരമേഖലയില് മതഭീകരവാദികളെ ഇരുതോളിലുമേറ്റിയാണ് പ്രതാപന് സ്നേഹ സന്ദേശയാത്ര നടത്തുന്നത്. തീരപ്രദേശത്ത് വര്ഗീയ ധ്രുവീകരണത്തിന് കോപ്പുകൂട്ടുകയാണ്. കേന്ദ്രത്തില് മന്ത്രിയില്ലാതെതന്നെ തൃശൂരിനായി മോദി സര്ക്കാര് നിരവധി കാര്യങ്ങള് ചെയ്തു. തൃശൂരില്നിന്ന് ഒരു മന്ത്രി കൂടി ഉണ്ടായാല് വലിയ കാര്യങ്ങള് നേടാനാകുമെന്നും സുരേന്ദ്രന് പറഞ്ഞു.