ന്യൂഡല്ഹി : ജെ.എൻ.യു വൈസ് ചാന്സലര് ഡോ. ജഗദീഷ് കുമാറിനെ വിദ്യാർത്ഥികൾ ആക്രമിച്ചതായി പരാതി. ക്യാമ്പസിൽ സന്ദർശനം നടത്തുനിടെ പതിനഞ്ചോളം വരുന്ന വിദ്യാർത്ഥികളുടെ സംഘം തന്നെ ആക്രമിച്ചെന്നാണ് വൈസ് ചാൻസിലർ ഡോ. എം ജഗദീഷ് കുമാറിന്റെ പരാതി.
ഹോസ്റ്റൽ ഫീസ് വർധിപ്പിച്ചതിൽ പ്രതിഷേധിച്ച് തന്റെ കാറിനു നേരെയും വിദ്യാർഥികൾ ആക്രമണം നടത്തിയെന്നും സുരക്ഷ ജീവനക്കാർ എത്തിയാണ് തന്നെ രക്ഷിച്ചതെന്നും വി.സി പറഞ്ഞു.
അതേസമയം, വൈസ് ചാന്സലറുടെ വാദം തെറ്റാണെന്നാണ് ജെഎൻ യു വിദ്യാർത്ഥി യൂണിയന്റെ വിശദീകരണം. വൈസ് ചാന്സലറെ ആക്രമിച്ചിട്ടില്ലെന്ന് ജെഎൻയു വിദ്യാർത്ഥി യൂണിയൻ പ്രതികരിച്ചു.
വിദ്യാർത്ഥികളുമായി ചർച്ച നടത്താതെ ഒളിച്ചു നടക്കുന്ന വിസി ക്യാമ്പസിൽ എത്തിയപ്പോൾ ഇക്കാര്യം ചോദ്യം ചെയ്തതാണെന്നും ഇക്കാര്യം ചോദിച്ചപ്പോൾ വിസി കടന്ന് കളയുകയായിരുന്നുവെന്നുമാണ് യൂണിയന്റെ വിശദീകരണം.