കൂടുതല്‍ കരുത്തേകാൻ ഒരുങ്ങി ജാവ, ജാവ 42 ബൈക്കുകള്‍. കരുത്ത് കൂടിയ ജാവ, ജാവ 42 ബൈക്കുകള്‍ക്ക് ഏകദേശം 15,000 രൂപ മുതല്‍ 20,000 രൂപ വരെ വില ഉയരുമെന്നാണ് സൂചന. നിലവില്‍ ജാവയ്ക്ക് 1.64 ലക്ഷം രൂപയും ജാവ 42-ന് 1.55 ലക്ഷം രൂപയുമാണ് എക്സ്ഷോറൂം വില. പുതിയ എന്‍ജിനിലുള്ള ജാവ ബൈക്കുകള്‍ 2020 പകുതിയോടെ വിപണിയില്‍ എത്തുമെന്നാണ് റിപ്പോര്‍ട്ട്.
ബിഎസ്-6 നിലവാരത്തിലുള്ള 334 സിസി എന്‍ജിനുകളായിരിക്കും ഈ ബൈക്കുകളില്‍ നല്‍കുക. ക്രൂയിസര്‍ ബൈക്ക് ശ്രേണിയിലേക്ക് കഴിഞ്ഞ ദിവസം അവതരിപ്പിച്ചിട്ടുള്ള ജാവ പരേക് എന്ന ബൈക്കില്‍ നല്‍കിയിട്ടുള്ള എന്‍ജിനാണിത്. 293 സിസി എന്‍ജിനാണ് നിലവില്‍ ഈ ബൈക്കുകളില്‍ പ്രവര്‍ത്തിപ്പിക്കുന്നത്.
പുതുതായി എത്തുന്ന ബിഎസ്-6 നിലവാരത്തിലുള്ള 334 സിസി സിംഗിള്‍ സിലിണ്ടര്‍ എന്‍ജിന്‍ 30.4 പിഎസ് പവറും 31 എന്‍എം ടോര്‍ക്കുമാണ് ഉല്‍പാദിപ്പിക്കുക. മുന്‍ മോഡലിനെക്കാള്‍ മൂന്ന് പിഎസ് പവറും മൂന്ന് എന്‍എം ടോര്‍ക്കും ഈ വാഹനം അധികം ഉല്‍പാദിപ്പിക്കുന്നത്.
