ന്യൂഡല്ഹി: ഐ.എന്.എക്സ് മീഡിയ കേസില് മുന് ധനമന്ത്രി പി. ചിദംബരത്തിന്റെ ജുഡീഷ്യല് കസ്റ്റഡി കാലാവധി നീട്ടി. ഒക്ടോബര് മൂന്ന് വരെയാണ് കസ്റ്റഡി കാലാവധി നീട്ടിയിരിക്കുന്നത്. ഇതോടെ, 14 ദിവസത്തേക്ക് കൂടി ചിദംബരം തിഹാര് ജയിലില് തുടരേണ്ടിവരും.
കേസില് ചിദംബരത്തിന്റെ ചോദ്യം ചെയ്യല് സി.ബി.ഐ പൂര്ത്തിയാക്കിയിരുന്നു.കേസില് എന്ഫോഴ്സ്മെന്റ് ഡയറക്ടറേറ്റിന് മുന്നില് കീഴടങ്ങാമെന്ന ചിദംബരത്തിന്റെ ഹര്ജി സിബിഐ കോടതി നേരത്തെ തള്ളിയിരുന്നു.
ഓഗസ്റ്റ് 21നാണ് ചിദംബരത്തെ സിബിഐ അറസ്റ്റ് ചെയ്തത്. ഒന്നാം യുപിഎ സര്ക്കാരില് ധനമന്ത്രിയായിരിക്കെ ഐ.എന്.എക്സ് മീഡിയ എന്ന കമ്പനിക്ക് വിദേശ ഫണ്ട് ലഭിക്കാന് വിദേശ നിക്ഷേപ പ്രോത്സാഹന ബോര്ഡിന്റെ അനുമതി ലഭ്യമാക്കുന്നതിന് അനധികൃതമായി പി ചിദംബരം ഇടപെട്ടെന്നാണ് കേസ്.