മുംബൈ: പുതിയതായി നിയമിതനായ നോണ്‍ എക്‌സിക്യുട്ടീവ് ചെയര്‍മാനും സ്വതന്ത്ര ഡയറക്ടറുമായ നന്ദന്‍ നിലേകനി ഇന്‍ഫോസിസിന്റെ തലപ്പത്ത് ജോലിചെയ്യുക പ്രതിഫലം പറ്റാതെയായിരിക്കും.
2010-ല്‍ ഡയറക്ടര്‍ എന്ന നിലയില്‍ അദ്ദേഹം അവസാനമായി വാങ്ങിയ പ്രതിഫലം 34 ലക്ഷം രൂപമാത്രമാണ്.
സഹസ്ഥാപകനും ചീഫ് എക്‌സിക്യുട്ടീവ് ഓഫീസറുമായ നിലേകനിക്ക് ഇന്‍ഫോസിസില്‍ 0.93 ശതമാനമാണ് ഓഹരി പങ്കാളിത്തമുള്ളത്.
ഓഗസ്റ്റ് 24-ന് വിശാല്‍ സിക്ക സിഇഒ സ്ഥാനത്തുനിന്ന് രാജിവെച്ചതിനെ തുടര്‍ന്നാണ് പുതിയ ചെയര്‍മാനായി നന്ദന്‍ നിലേകനിയെ കൊണ്ടുവന്നത്.
പുതിയ സിഇഒയെ കണ്ടെത്തുന്നതിനായിരിക്കും പ്രഥമ പരിഗണനയെന്ന് നിലേകനി വ്യക്തമാക്കിയിട്ടുണ്ട്.
ചീഫ് ഓപ്പറേറ്റിങ് ഓഫീസര്‍ സ്ഥാനത്ത് യു.ബി പ്രവീണ്‍ റാവു തുടരുമെന്നും കമ്പനി അറിയിച്ചു.
