ഡല്ഹി: പുണെ ആസ്ഥാനമായി പ്രവര്ത്തിക്കുന്ന സീറം ഇന്സ്റ്റിറ്റ്യൂട്ട് ഓഫ് ഇന്ത്യ നിര്മിച്ച മലേറിയ വാക്സീന് ലോകാരോഗ്യ സംഘടനയുടെ അനുമതി. ഓക്സ്ഫോര്ഡ് യൂണിവേഴ്സിറ്റിയും സെറം ഇന്സ്റ്റിറ്റ്യൂട്ട് ഓഫ് ഇന്ത്യയും ചേര്ന്നാണ് R21/Matrix-M മലേറിയ വാക്സിന് വികസിപ്പിച്ചത്.
നാല് രാജ്യങ്ങളില് ക്ലിനിക്കല് ട്രയല് നടത്തിയ ഈ വാക്സീന് നല്ല സുരക്ഷയും ഉയര്ന്ന ഫലപ്രാപ്തിയും നല്കുന്നതായി കണ്ടെത്തി.
കുട്ടികളില് മലേറിയ തടയുന്നതിനുള്ള ലോകത്തിലെ രണ്ടാമത്തെ വാക്സീനാണ് ഇതെന്ന് സീറം ഇന്സ്റ്റിറ്റ്യൂട്ട് ഓഫ് ഇന്ത്യ അറിയിച്ചു.
ലോകാരോഗ്യ സംഘടനയുടെ അംഗീകാരം ലഭിച്ചതിനാല് R21/Matrix-M വാക്സിന് ഡോസുകള് അടുത്ത വര്ഷം തന്നെ വിപുലമായ റോള് ഔട്ട് ആരംഭിക്കാന് തയ്യാറാകുമെന്ന് സീറം ഇന്സ്റ്റിറ്റ്യൂട്ട് ഓഫ് ഇന്ത്യ സിഇഒ അഡാര് പൂനവല്ല പറഞ്ഞു. നിലവില്, ഘാന, നൈജീരിയ, ബുര്ക്കിന ഫാസോ എന്നിവിടങ്ങളില് വാക്സിന് ഉപയോഗിക്കുന്നതിന് ലൈസന്സ് നല്കിയിട്ടുണ്ട്.
നൊവവാക്സിന്റെ അഡ്ജുവന്റ് സാങ്കേതിക വിദ്യ അടിസ്ഥാനമാക്കിയായിരുന്നു വാക്സീന് നിര്മാണം. പ്രതിവര്ഷം 10 കോടി ഡോസ് മലേറിയ വാക്സീന് നിര്മിക്കാനുള്ള ശേഷി സെറം ഇന്സ്റ്റിറ്റ്യൂട്ട് ഓഫ് ഇന്ത്യയ്ക്ക് ഉണ്ട്. അടുത്ത രണ്ടു വര്ഷം കൊണ്ട് ഇത് ഇരട്ടിയാക്കുമെന്ന് കമ്പനി അറിയിച്ചു.